بلوچ آجوئی لوٹوکیں سروک رھیم ایڈوکیٹ ءَ ماں رسانکدر ءَ وتی شنگ کرتگیں درشانے ءَ گوشتگ کہ اسلام آباد ءَ بوتگیں شنگھائی تاون کانپرنس ءِ درگت ءَ من کانپرنس ءِ ھواریں مردمانی دلگوش ءَ گوں بلوچانی آجوئی جھد ءِ نیمگ ءَ کنگ لوٹ آں۔ من شنگھانی تاون گل ءِ باسکیں ڈیھانی درسیں جھگیراں تچکی ءَ گوش آں کہ بلوچستان پاکستان ءِ بھرے نہ اِنت۔ بلکیں اے یک آجوئیں ریاستے بوتگ پاکستان 1947 ءَ جوڑ بوتگ۔ بلوچستان ھندوستان ریاست ءِ نہ بوتگ، پمیشکا ایشی جوڑ بوگ ءِ وھد ءَ اے پاکستان ءِ بھرے نہ بوتگ۔ پد ءَ پاکستان ءَ بلوچستان ( اے ریاست کلات گوشگ بیت ) سر ءَ پہ زور اُرش کرتگ، دستیگ کرتگ ءُ ھوار کرتگ۔ ھما اِنت بلوچستان ءِ مردم آجوئی ءِ جھد ءَ کنگ ءَ اَنت۔ گوستگیں بیست ءُ پنچ سال اِنت زورگپتیں بلوچستان ءَ پاکستان ءِ زورگپتی، آئی زورگری شوربندی ءُ بلوچ راجی مڈیانی لٹ ءُ پل ءِ بگیری ءَ جھد یکشل ءَ برجاہ اِنت۔
آئی ءَ گوشتگ کہ اے پاکستان نہ اِنت بلکیں بلوچستان اِنت کہ ایشی سیمسر گوں ایران ءُ اوگانستان ءَ ھوار بنت ءُ ایران، اوگانستان ءَ بگر داں روکپت ءُ ایشا ءِ میانی ڈیھانی روگ ءِ راھانی ڈیھ اِنت۔
بلوچ رھشون ءَ گوشتگ کہ اے زورگپتیں بلوچستان اِنت ایشی مزن ھور ءُ اپریکی مزن بر ءِ نزیکیں دریا ءِ بندرگاہ اَنت۔ اگاں سنگھائی تاون گل ءِ باسکیں ڈیھ دمگ ءِ ایمنی، دیمروئی ءُ وشھالی ءَ ھوار دمگ ءِ ڈیھانی گون ءَ رھوت ءُ کمک لوٹ اَنت گڑا آیاں پاکستان ءِ چہ زورگپتیں بلوچستان ءَ درگپگ ءَ گوشگ ءُ زور دیگ لوٹ ایت۔ ایس سی او ءِ باسکیں ڈیھانی انچیں کرد آجوئیں بلوچستان ءَ پہ ھمے گپ ءَ جاڑیگ کنت کہ آ ایس سی او ءِ گون ءَ رھوت ءُ کمک ءِ جھدانی تہ ءَ پہ کمک کنگ ءَ وڑ ءُ پیمے ءَ دلگوش بہ دنت۔ اگاں پاکستان بلوچ راجی آجوئی زرمبشت ءَ ناشرکاری ءِ ھساب ءَ پیش کنگ ءَ گیشیں جھد ءَ کنت گڑا من ءَ اوست اِنت کہ باسکیں ڈیھانی شرپمندیں جھگیر راجی آجوئی زرمبشت ءُ ناشرکاری ءِ میان ءَ پرک ءَ شریں وڑے ءَ زان اَنت۔
