بلوچستان آجوئی سنگر ( بی ایل ایپ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ یازدہ اکتوبر آدینگ ءِ روچ ءَ گل ءِ دو سرمچار آواران ءِ ھند پیراندر سورک کور ءِ نیمگ ءَ پہ گل ءِ کارے ءَ سپر کنگ ءَ بوتگ اَنت کہ پاکستان ریاست ءِ جوڑ کرتگیں کشندہ ٹولی ءِ کارمنداں راہ ءِ سر ءَ سنگر گپتگ ءُ نندوک بوتگ اَنت۔ آیاں دوئیں سرمچاران ءَ دیستگ تیرگواری بندات کرتگ ءُ انگر کنگ ءِ جھد کرتگ، تیرگواری ءِ زد ءَ آھگ ءَ کیپٹن تالب ءُ آدل شھید بوتگ اَنت۔
آئی ءَ گوشتگ کہ کیپٹن تالب پنام مودی ء میر مھمد جاہ منند دراسکی آواران 2012 ءَ بی ایل ایپ ءَ ھوار بوتگ ءُ پہ بلوچستان ءِ آجوئی ءَ وتی زندگی ببا داتگ۔ آئی ءَ باز شریں جنگاں بھر زرتگ ءُ دژمن ءَ جانی ءُ مالی تاوان داتگ۔ بیسیمگ رکشان، بالگتر، واشک، مشکے، آواران، کیچ، اورماڑہ ءُ گچک پنجگور ءَ جتائیں ھنداں پہ گل ءِ سوبمندیں آپریشناں آئی جوانیں کرد پیلو کرتگ۔
جارکش ءَ گوشتگ کہ شھید تالب گوں وتی ھمبلاں مھروان ءُ ھمدردے بوتگ، گوں ارادہ ءُ مھکمی ءَ پرکار بوتگ۔
آئی ءَ گوشتگ کہ ریاستی لشکر ءَ شھید ءِ کھول مچی سزایانی نشانگ کرتگ دانکہ آئی ءَ نزور بہ کنت ءُ چہ راجی جھد ءَ دزکش بہ بیت۔ کھول ءِ مردم زوریں بیگواھی ءِ نشانگ کرتگ اَنت، آیانی سامان ماندارگ بوتگ اََنت ءُ آ پہ لڈ ءُ بار کنگ ءَ لاچار کنگ بوتگ اَنت چہ درسیں زوراکیاں ابید شھید ءِ ارادہ ءِ تہ ءَ کمی نہ یتکگ۔
جارکش ءَ گوشتگ کہ شھید ءَ درسیں جنجال ءُ ریاستی لشکر ءِ زوراکیاں ابید چہ راجی آجوئی ءِ وتی لوٹ ءَ پد کنز نہ بوتگ۔ آئی ارادہ ءُ دیمونی ھمے گپ ءِ منانک اَنت کہ جھد ءِ راہ ءَ دیم ءَ آتکگیں اڑانداں آئی توکل پروش دات نہ کرتگ۔ آئی دوازدہ سالانی جھد دیمونی ءِ لیکہ ءِ کرد ءِ درور اِنت ءُ گڈی ءَ شھیدانی کاروان ءِ بھر بوتگ۔
آئی ءَ گوشتگ کہ شھید سرمچار آدل پنام ناسر ء نواب جاہ منند زیارت ڈن، گوستگیں یک سالے بیت گوں بی ایل ایپ ءَ کار ءَ بوتگ ءُ گل ءِ شھری نیٹورک ءِ بھر بوتگ، آ یک مھکم ارادہ ءُ وانندگ ءُ پہ سرڈگار ءِ آجوئی جھد ءَ وتی جان ءِ نہ چاروکیں نہ ترسیں سرمچارے اَت۔ دژمن ریاستی چیریں ادارھاں دوبر ءَ زوریں بیگواھی ءِ نشانگ کرتگ بلے چہ درسیں آئی جھد ءِ تہ ءَ کمی آرگ ءَ بے سوب بوتگ اَنت۔
جارکش ءَ گوشتگ کہ دژمن ” کشندہ ٹولی“ ءِ درسیں کارمند پجارگ بوتگ اَنت ءُ درساں زوتاں چہ زوت آیانی گڈی ءَ آسر ءَ سر کن ایں۔ بلوچ راجی آجوئی زرمبشت ءِ بگیری ءَ پرکاریں ناشرکار ھچ وڑ ءَ بکشگ نہ بنت۔
میجر گھرام ءَ گوشتگ کہ بی ایل ایپ وتی نہ ترسیں ھمبل سرمچار شھید کیپٹن تالب ءُ شھید آدل ءَ اے گرانبھائیں دیمونی ءَ ستک شانی ندر کنت ءُ ھمے کول ءَ کنت کہ شھیدانی کاروان ھر پیم ءَ وتی گڈی منزل ءَ سر کنگ بیت ءُ بلوچستان ءِ آجوئی ءِ واب راست کنگ بیت، ءُ دژمن ءَ آئی گڈی سیمسر ءَ سر کن ایں۔
بنشون: درشان / اکس: زرمبش
