مروچی جیڑگی ایں، سسا کنگی این ءُ اے چارگی اِنت کہ پاکستان کجام تواناں وادار کنگ ءُ وتی سیتاں ھمدپ کنگ ءَ اِنت
بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ گْوشتگ مئے مڈیاں کجام ھم ڈیھے بہ پل ایت ما آئی ءِ دیم ءَ گھگیری کن ایں، آ چین بیت یا جھان ءِ دگہ مستریں توانے۔کس اے گمان مہ کنت کہ اے گھگیری تیوک ءَ چین ءِ دیم ءَ بیگ ءَ اِنت ءُ باند ءَ دگہ واکے ھمے کار ءَ کنت گڑا بلوچ ایوک ءَ سیل چار ایت پہ چوشی ءَ کس دلجم ءُ ایمن مہ بیت۔
اے گپ ءَ آئی ءَ شھید انور ایڈوکیٹ کیچ – گوادر ھنکین ءِ ھنکینی کونسل ءِ نیاد ءَ جتگ اَنت۔
آئی ءَ گْوشتگ بلوچستان ءِ تہ ءَ بیت کنت باند ءَ چین ءِ پروش دیگ ءَ دگہ واکے دیم ءَ بہ کنز ایت ، گوں پاکستان ءَ بلوچ ءِ مڈیانی سودا بہ جنت ءُ بہ جیڑ ایت کہ بہ گند ئے بلوچاں چین ءِ بگیری ءَ گھگیری کرتگ ءُ نی منی بگیری ءَ نہ کنت۔ بلے چوش نہ اِنت مئے سیتانی دیم ءَ کسے ھم بہ اوشت ایت ما گوں آئی ءَ دیم پہ دیم بہ این ءُ بلوچ ءِ سیتاں پھریز ایں۔
چیئرمین ءَ درائینتگ مئے کش ءُ کر ءَ تبدیلی ھست اَنت ، چد ءُ پیش مئے ھمساھگیں ڈیھے ءَ انچوش جاور اناگاہ ءَ مٹ بوت اَنت۔ ھما ڈیھ کہ گوں آئی ءَ مئے دیرگیں سیادی ھست اَنت۔ ما پہ نوکیں جاوراں ساڑی نہ اَت ایں بلے نی مارا اناگاھیں مٹیانی بارہ ءَ جیڑگی اِنت ءُ وت ءَ ساڑی کنگی اِنت۔ مارا جھان ءِ جاور سرپد بیگی اِنت ، ھمود ءَ کہ ما نشتگ ایں، مئے سر ءَ زورگریں ڈیھے واکدار اِنت ءُ دمگ ءِ تہ ءَ آئی ءِ گوں دگہ راجاں سیت ھست اَنت ، اے درس مارا شر چارگی ءُ وتی بانداتگیں گامگیج ءِ سر ءَ جیڑگی اِنت۔
آئی ءَ زور داتگ ءُ گْوشتگ مروچی جیڑگی ایں، سسا کنگی این ءُ اے چارگی اِنت کہ پاکستان کجام تواناں وادار کنگ ءُ وتی سیتاں ھمدپ کنگ ءَ اِنت ، مارا پیش کپگی اِنت ءُ ھما تواناں سھی کنگی اِنت کہ بلوچ اگاں چین ءَ نہ ھل ایت گڑا آ دگہ توان ھم بلوچستان ءِ بارہ ءَ چوشیں واب مہ گند اَنت۔
چیئرمین ءَ پہ ھمساھگیں ڈیھاں گل ءِ سال دو ہزار چاردہ ءِ سیشن ءَ جوڑ بیتگیں شوندات ءِ نیمگ ءَ دلگوش گْور کنان ءَ گْوشتگ وتی ھمساھگیں ڈیھ ءِ بارہ ءَ شونداتے کہ دہ سال پیش ما جوڑ کرتگ مروچی آئی ءِ برورد ءَ ما گندگ ءَ ایں۔ ھمے شوندات ءِ سر ءَ کار کنگ ءَ ما دیم ءَ شتگ ایں۔ الم ھرچ شوندات ءِ لھتے کشانکی ( نیگٹیو ) ئیں سان بہ اَنت ، بلے گیشتر پہ ما ءُ پہ آ دگہ آجوئی لوٹوکیں گلاں اے شوندات ءِ شریں سان ھست اَنت۔ بلے ما مہ شموش ایں کہ جھان ءِ مزن ءُ توانمندیں ڈیھ دنیگت جیڑگ ءَ اَنت ءُ گوں یک دومی ءَ دیم پہ دیم اَنت۔
ڈاکٹر نسیم ءَ گْوشتگ مئے جھد ءِ بندر ءُ زور بلوچستان ءِ چہ پاکستان ءَ آجوئی اِنت ، مارا وتی سرڈگار ءِ سر ءَ گیش ءَ گیش وتی مردماں آجوئی ءِ کلوہ سر کنگی اِنت ءُ ھمے رد ءَ کوشست کنگ بہ بیت کہ بلوچ گلزمین ءِ نندوک گوں مئے گل ءَ ھمراھداری بہ کن اَنت۔
آئی ءَ گْوشتگ گلزمین ءَ بی این ایم ءِ کارانی دیم ءَ برگ ءَ مارا سیلانی (cell) تہ ءَ کار کنگ لوٹ ایت ، مردماں گل ءُ جھد ءِ بارا ءَ آگاھی دیگ بہ بیت ءُ ما ھمے کار ءَ وتی زمہ واریانی تہ ءَ ھوار بہ کن ایں۔
سرکماش ءَ کیچ ۔ گوادر ھنکین ءِ سیکریٹری گزارش ( رپورٹ ) ءِ سر ءَ سکا دلجمی درشان کرتگ ءُ نوک گچین بیتگیں اگدہ داراں مبارکبادی داتگ ءُ گْوشتگ کہ من بازیں تکاں کار کرتگ ، ڈیھ ءَ ءُ درانڈیھ ءَ مروچی ھما گزارش کہ اے ھنکین ءَ پیش بیتگ باز ساڑایگ کرز ایت۔ امیت کن آں کہ دیمتر ءَ شرتریں رنگے ءَ کار کنگ بیت۔
آئی ءَ گْوشتگ کار جھل ءِ سنگت کن اَنت ءُ ھمیشانی شریں کارانی برورد ءَ بنجاھی زمہ واراں سوبمندی رس ایت ءُ ساڑایگ بہ اَنت۔ مئے برز ءِ تک ءَ باز کار اَنت میڈیا اِنت ، ھیلکاری کتاب اَنت ءُ دگہ ایشانی تہ ءَ دیمروئی پمیشکا ھست کہ شما جھل ءِ سنگت کمک ءُ ھمکار اِت۔
سرکماش ءَ دلگوش پرینتگ ءُ گْوشتگ پارٹی ءِ آئینی تْرامگیجانی ( ادارھانی ) گھتر کنگ ، آیاں گوں یک دومی ءَ ھمگرنچ کنگ ءُ گستائی ءَ ھم شر تْرامگ ( منظم کنگ ) المی اِنت۔ انچوش کہ مئے دری کارانی تک روت ڈن ءَ کار کنت آئی ءَ مردمی اگبالانی تک ءِ ھم کمک لوٹ ایت ءُ رسانکی تک ءِ ھم۔ اے وڑ گوں ھمگرنچی ءَ کار آسان بیت ءُ چار پھناتی ءَ سرجمیں دْروشمے ءَ بیت۔ مئے کوشست ھمیش بہ بیت کہ پہ آیوکیں سنگتاں کار آسان بہ بیت۔ ما آیوکیں سنگتاں چیزے کار کن ءُ دے ایں ، داں کہ آ سنگت دیم ءَ بہ رو اَنت ناں کہ پد ءَ چہ بن ءَ بندات بہ کن اَنت۔ نی ما در برگ ءَ ایں کہ چوں اینچو ادارہ گوں یک دومی ءِ ھمگرنچے ءَ کاراں شرتر کرت کنت ، آیوکیں روچاں وھدے ایشانی آسر کئیت ما شری ءُ دیمروئی گند ایں۔
اے نیاد ءَ کیچ۔گوادر ھنکینءِ چارگزاری پتر آسر کنگ ءُ نوکیں گچینکاری ھم بیتگ اَنت ، چیئرمین ءَ نوک گچین بیتگیں اگدہ دار سرکماش بابا جی آر، کمک سرکماش بھار ، کارگشاد جیھند ، کمک کارگشاد بانک زینل ءُ ھسابدار سید آیانی اگدھانی سر ءَ گچین بیگ ءَ پد سوگند وارینتگ اَنت۔
