چین ناں ایوک ءَ گزرانکی بالادستی لوٹ ایت بلکیں اے ارزشتمندیں دریائی راہ ءَ ھم وتی دست ءَ آرگ ءَ دلمانگ اِنت۔
بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ راجانی سنت ءِ مردمی اگبالانی پتر ءِ 57 می نیاد ءِ میان ءَ ماں ھمگوریں نیادے ءَ گپ جنان ءَ بلوچستان ءَ چین ءِ گیش بیوکیں دزرس ءُ سان ءِ سر ءَ ایرد گپتگ۔
تموکو دیمروئی ربیدگی انجمن ( ای سی ایس او سی ) ءِ چیردستی ءُ انجمن ءِ جھگیر ءُ پی ٹی ایم یورپی پتر ءِ میان راجی سپارتکاری ءُ دری کارانی سروک پزل الرھمان آپریدی ءِ پاگواجھی ءَ اے نیاد برجم دارگ بیتگ۔
ڈاکٹر نسیم ءَ چین پاکستان گزرانکی راھداری ( سی پیک ) ءِ پارست ءَ پاکستان ءِ گوں چین ءَ ھمکاری ءِ رد ءَ ودی بیتگیں جیڑہ ءُ بے تاھیریانی سر ءَ گپ جتگ۔
آئی ءَ ھرمز تنگ ءِ نزیک ءَ برجاھیں گوادر ءِ تزویراتی ارزشت ءِ سر ءَ زور داتگ ءُ گْوشتگ ، چین ناں ایھوک ءَ گزرانکی بالادستی لوٹ ایت بلکیں اے ارزشتمندیں دریائی راہ ءَ ھم وتی دست ءَ آرگ ءَ دلمانگ اِنت۔ گوادر ءِ واڑ کنگ ءِ مول ایوک ءَ بلوچانی گر ءُ دار نہ اِنت بلکیں اے ھمے دارنگازی کنت کہ چین پہ میان راجی واکاں پر ارزشتیں اے سرڈگار ءِ سر ءَ وتی دزرس ءُ واک ءِ گیش کنگ ءَ باڑا اِنت۔
آئی ءَ بلوچستان ءَ چین ءِ دزمانجنی ءِ پد ءَ مردمی اگبالانی بگیریانی نشاندھی کرتگ ءُ گْوشتگ اے گیشتر دیمروئی دیوکیں گامگیجے لیکگ بیت بلے سی پیک ءَ دمگ ءِ گْرانھریں مڈی ، چوش کہ گیس ، سھر ءُ پوپل ( کاپر ، تانبا ) ءِ لٹ ءُ پل گیش کرتگ۔ چہ گوادر بندن رنگیں شوراں بازیں ھلک ءُ میتگ سرجم ءَ لڈینگ بیتگ اَت۔ سی پیک پہ بلوچاں وشھالی ءِ مستاگے نہ اِنت بلکیں پدمنتگی ءُ درپہ دری ءِ دگہ چیدگے۔
پہ بلوچاں گْوستانک ءُ ربیدگیں بستار داریں شھر گوادر ءَ لشکری بنجل جوڑ کنگ ھم بی این ایم ءِ سرکماش ءِ گْوشتانک ءِ پرارزشتیں بھر اَت ، آئی ءَ دلپدردی درشان کنان ءَ گْوشتگ گوادر ءِ نندوک نی ابید چہ لشکر ءِ موکل ءَ وتی شھر ءَ شت نہ کن اَنت پرچا کہ اے دمگ چین ءِ تالانیں سرڈگاری سیاست ءِ لوٹانی رد ءَ لشکرجاھے جوڑ کنگ بیتگ۔
آئی ءَ وتی زور بیگواھی ءِ درور داتگ ءُ ھما دردناکیں مارشتانی نیمگ ءَ دلگوش پرینتگ کہ زور بیگواھیں مردم ءُ آیانی کھول دیپان اَنت اش ، آئی ءَ گْوشتگ پاکستان ءِ زور بیگواھیانی تْرام اتگیں شوندات بلوچ راج ءِ آجوئی ءِ لوٹ ءِ گٹگیر کنگ ءُ مردمانی ترسینگ ءَ ٹاہ اتگ۔ کہ ایشی ءِ تہ ءَ در آمیدگسی کوش ءُ آزار دئی ھم ھوار اَنت۔ بلوچستان ءِ زور گرگ ءَ پد چہ 1948 ءَ بہ گر داں انی بلوچ راج زرواکیانی آماچ اِنت۔
پاکستان ءَ دگہ چیردستیں راجانی سر ءَ بیوکیں زوراکی ءُ آیانی مردمانی اگبالانی لگتمالی ءِ سر ءَ آئی ءَ گْوشتگ ھزاراں بلوچ، پشتون ، سندی ءُ کشمیری ابید چہ آمیدگس ءِ پرمان ءَ بندیگجاھاں بند اَنت۔ اے ناراھیں بندیگجاہ ’ نا مزدانکی ءِ بلیک ھول ‘ اَنت کہ آ اود ءَ بندیگ بیمناکیں رنگے ءَ آزار دیگ بہ اَنت ءُ چہ اے زور بیگواھیں بندیگاں بازینے پد ءَ بھ گندگ نہ بیت۔
وتی گڈی گپانی تہ ءَ آئی ءَ میان راج ءِ سر ءَ زور داتگ کہ آ وتی بے تواری ءَ بہ پروش ایت۔ بلوچستان ءِ سر ءَ برجاھیں مردمی اگبالانی لگتمالی زیتیں میان راجی دلگوش ءِ لوٹوک اَنت۔ پاکستان ءَ اے گامگیجانی سر ءَ پسو دیگی اِنت ، مردمی اگبالانی بگیریانی آزاتیں رنگے ءَ پٹ ءُ پول بہ بیت ءُ یکشلیں بگیریانی سر ءَ پاکستان ءِ چک ءَ پابندی جنگ بہ بیت۔
آئی ءَ گوں برجمیں دانکاں دمپار اتگ ’ اے مئے مانشت ءِ جنگ اِنت ‘ میان استمان بلوچ راج ءِ وتکواھی ءُ آجوئی ءِ جھد ءَ آئیءِ ھمراہ بہ بیت۔‘‘
