ڈیرہ بگٹی: زورگریں پاکستانی لشکر ءِ لشکرکشی ءِ میان ءَ چہ جنگی بالگردانی تیرگواری ءَ جنین ءُ زھگاں ھوار ھشت مردم ٹپی بوتگ اَنت۔
اھوالکار ءِ رد ءَ ڈیرہ بگٹی ءِ ھند سوئی ءَ جتا جتائیں جاھاں لنجو،سگاری ءُ رئیس توک ءَ زورگریں پاکستانی لشکر ءِ لشکرکشی برجاہ اِنت۔ لنجو سگاری ءَ پاکستانی لشکر ءِ جنگی بالگرداں وڈیرہ نور الی ھان نامیں مردمے ءِ گِس ءِ سر ءَ تیرگواری کرتگ، دو جنین ءُ دو زھگ ٹپی بوتگ اَنت۔
ھمے ھند ءَ سدیک دیناری بگٹی نامیں مردمے ءِ گس ءِ سر ءَ چہ جنگی بالگردانی تیرگواری ءَ جنین ءُ زھگے ءَ ھوار سے مردم ٹپی بوتگ اَنت۔
چہ جنگی بالگردانی تیرگواری ءَ مردمانی ٹپی بوگ ءَ ابید بازیں مال ءُ دلوت ھم مرتگ ءُ ٹپی بوتگ اَنت۔
ھندی بنشون ءِ رد ءِ چہ سند ءِ دمگ کشمور ءِ نیمگ ءَ دہ ءَ گیش بکتربند گاڑیاں ھوار چل گاڑیانی کاروانے لنجو سگاری ءِ نیمگ ءَ شتگ۔
انچوش گمان کنگ بوگ ءَ اِنت کہ اے لشکرکشی انگت ءَ دراجکش کنگ ءُ گیش زوراکی کنگ بہ بیت۔
