بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں مرچی کلات ءَ زورگریں پاکستانی لشکر ءِ یک کاروانے ءَ ھواریں گاڑی گوں چیر کرتگیں شورھانی اُرش ءِ ھواری ءَ سنگر گپتگ ءُ نشانگ کرتگ اَنت، اے ارش ءَ نو دژمنیں کارمند مرتگ ءُ پنچ ٹپی بوتگ اَنت۔
آئی ءَ گوشتگ کہ کلات ءِ ھند دشت مھمود ءَ بی ایل اے ءِ سرمچاراں زورگریں پاکستانی لشکر ءِ کاروان ءَ ھواریں پیکپ گاڑی یے گوں تراکناکیں شورھاں نشانگ کرتگ۔ ایشی آسر ءَ گاڑی سرجم ءَ تباہ بوتگ ءُ سواریں درسیں پنچ کارمند جاھی مرتگ اَنت۔ سنگر گپتگیں سرمچاراں کاروان ءَ ھواریں آدگہ گاڑیانی سر ءَ گوں مزن ءُ وتکاریں سلاھاں اُرش کرتگ چہ ایشی آسر ءَ دگہ چار کارمند مرتگ ءُ کم چہ کم پنچ ٹپی بوتگ۔
جارکش ءَ گوشتگ کہ بی ایل اے ءِ سرمچاراں دگہ یک کاروائی یے ءَ 28 ستمبر ءَ گْوادر ءِ ھند پسنی ءَ اینٹی نارکو ٹکس ءِ کارمند گوں دستی بمب ءَ ھما وھد ءَ نشانگ کرتگ اَنت آ وتی بنجل ءِ دیوال ءِ تہ ءَ مچ بوتگ اَنت۔ تراک ءِ آسر ءَ اے کارمنداں جانی ءُ مالی تاوان بوتگ۔
بی ایل اے ءِ جارکش جیھند ءَ اُرشانی زمہ واری منّ اتگ ءُ گوشتگ کہ دژمن ءِ سر ءَ اُرشانی درچ ءَ برجاہ دارگ ءِ کول ءَ کن ایں۔
