امریکی میگزین ٹائم ءَ سال 2024 ءِ 100 نامداریں مردمانی تہ ءَ بلوچ یکجھتی کمیٹی ءِ سروک ڈاکٹر ماہ رنگ ءِ نام ھوار کرتگ۔
اے شرپ آئی ءَ بلوچ ءِ ھکانی لگتمالیانی بگیری ءَ توار چست کنگ ءُ زوریں بیگواھیانی بگیری ءَ انوگیں جھد ءِ مز ءَ دیگ بوتگ۔ اے میان ءَ ترسینگ ءُ آزاراں ھوار بازیں بیھارانی دیمپان بوتگ۔
ٹائم میگزین ءَ پہ وتی راج ءِ رھشونی ءَ ڈاکٹر ماہ رنگ ءِ کرد ساڑاتگ کہ آئی داں اسلام آباد ءِ پر ایمنیں روانک ءِ سروکی کرتگ ءُ زور بیگواھیں مردمانی کھولانی توار جوڑ بوتگ۔
میگزین ءِ رد ءَ درسیں ترساں ابید ماہ رنگ وتی مشن ءَ راست بوتگ۔ آ سدک بوتگ کہ وتی سیاسی سرگرمیانی پارست ءَ آدگراں انساپ ءُ مردمگری ءِ جھد ءَ ھوار کنگ ءِ ھیل ءَ دنت۔
ڈاکٹر ماہ رنگ ءِ گوشگ اِنت سکا ترس اِنت، زوراکی اِنت، ما پد ءَ ھم پہ مردمگری ءُ انساپ ءَ وتی جھد ءَ برجاہ دار ایں۔
