بلوچ راجی زرمبشت ( بی این ایم ) نیدرلینڈز چیپٹر ءِ چیردستی ءَ ایمسٹر ڈیم ءَ شھید ڈاکٹر منان بنزہ ءِ یک دیوانے سرکماش مھیم ابدرھیم ءِ سروکی ءَ برجم دارگ بوتگ۔ دیوان چہ بلوچستان ءِ شھیدانی یات ءَ دو دمان بے تواری ءَ بندات کنگ بوتگ۔ دیوان ءَ بی این ایم ءِ جتائیں باسکاں کارگشاد دیدگ، کلیتدار بھار، امران ھکیم، ولید، ھلیم، ھونک، یوسپ، شاہ داد، راشد ءَ بھر زرتگ۔
آیاں دیوان ءِ ارزیشت، سیاسی پارٹیانی تہ ءَ باسکانی زمہ واری ءُ زھرشانیانی باروا گوں دلجمی ءَ تران کرتگ۔
آیاں گوشتگ کہ بلوچستان ءَ چوشیں ھند نیست کہ اود ءَ پاکستانی لشکر ءَ زوراکی نہ کرتگ۔ زوریں بیگواھی، درکانودی کوش ءُ مڈیانی لٹ ءُ پل برجاہ اِنت۔ ریاست ایمنیں زھرشانیانی سر ءَ بیڑ برگ ءُ زوراکی کنگ ءَ اِنت میان استمانی تک ءَ بلوچ زرمبشت ءِ دارگ ءِ جھد ءَ کنگ ءَ اِنت۔
آیاں نوشکے، مستونگ ءُ گْوادر ءِ انوگیں زوراکیانی درور داتگ کہ اود ءَ ریاستی لشکر ءَ پر ایمنیں زھرشانی کنوکانی سر ءَ تیرگواری کرتگ ءُ چار ورنا شھید ءُ باز ٹپی بوتگ اَنت۔ رسانکدر پیش ءَ ھم نہ بوتگ ءُ انوں ھم دامگ نیست، بس لھتے شھرانی تہ ءَ ھست آدگہ جاھاں نیست۔
آیاں گوشتگ کہ بلوچستان ءَ رسانکدر ءِ سر ءَ پابندی انت ءُ پہ کارکنوکیں اھوالکاراں جنجال ودی کنگ بوتگ اَنت۔ پہ سیاسی ءُ مردمی ھکاں کارکنوکاں کار کنگ ءِ ھچ وڑیں گنجاھشت نیست۔ ریاستی لشکر مردمانی زندگی ءُ گوں مردمی ھکاں لیب کنگ ءَ اِنت۔بلے اے نوکیں دھر ءِ باروا سرپدی نہ بوگ ءِ ھساب ءَ اِنت۔
آیاں زور داتگ کہ میان استمانی تک ءَ پاکستان ریاست ءِ زوراکیانی بگیری ءَ ترندیں توار چست کنگ مئے راجی زمہ واری انت۔
آیاں گوستانک ءِ درور داتگ ءُ گوشتگ کہ سرجمیں جھان ءَ زورگریں ریاست مدام پہ ایمنیں زرمبشتاں جنجال ودی کن اَنت، آیاں آزار ءِ پارست ءَ دارگ ءِ جھد ءَ کن اَنت۔ دانکہ آ آزاردھی ءَ نیمون جوڑ کن اَنت ءُ آیاں دارگ ءِ جھد ءَ کن اَنت۔ پاکستان ھم ھمے وڑ ءَ کنگ ءَ اِنت۔
