موساکیل: پجار نہ بوتگیں سلاہ بندیں مردماں گیس شرکت ءِ بنجل ءِ سر ءَ اُرش کرتگ ءُ بیست ءَ گیش مردم دزگیر کرتگ مشین ءُ سامان مانداشتگ اَنت۔
بنشون ءِ رد ءَ سلاہ بندیں مردماں موساکیل ءَ کوہ سلیمان ءِ بینی ڈب ءَ گیس پیلڈ شرکت ءِ کرکنہ تمن کیسرانی بنجل ءِ سر ءَ اُرش کرتگ۔
انچوش گوشگ بوگ ءَ اِنت کہ ارشکاراں گیس شرکت ءِ بنجل ءَ ساڑی ئیں بازیں بلڈوزر، ایکسکویٹر ءُ مشین ءُ سامان مانداشتگ اَنت۔
ھندی مردمانی گوشگ اِنت کہ ھمے اُرش ءَ چل ءَ گیش مردم دزگیر کنگ ءُ برگ بوتگ اَنت۔ بلے اے باروا پولیس ءِ گوشگ اِنت دزگیر کرتگیں مردم بیست ءَ گیش اَنت۔
اُرش ءِ زمہ واری انگت ءَ ھچ گل ءَ نہ زرتگ۔
