گْوادر: دشت ءِ جاہ منند چار ماہ پیش پاکستانی چیریں ادارھانی دست ءَ زور بیگواہ کنگ بوتگیں ورنا مسلم ءِ کھول ءَ گوں مردمی ھکانی گلاں پہ آئی آجوئی ءَ توار چست کنگ ءِ لوٹ کرتگ۔
آئی گوشگ اِنت کہ مسلم ء مھمد رھیم دشت شولیگ ءِ جاہ منند اِنت کہ پاکستانی چیریں ادارھانی کارمنداں چہ گْوادر شھر ءَ 7 مئی 2024 ءَ مردمانی دیم ءَ آوار جتگ ءُ بیگواہ کرتگ۔ چہ ھما روچ ءَ پد آئی بارواھچ وڑیں ھال دیگ نہ بوتگ کہ چون اِنت۔
کھول ءِ گوشگ اِنت کہ مسلم ءِ باروا ما ھندی میر ءُ مھترانی کِر ءَ شتگ ءُ گپ کرتگ، آیاں مارا بس دلبڈی داتگ بلے چار ماہ ءُ بیست روچ ءِ گوزگ ءَ پد ھم انگت ءَ مارا ھچ اِش نہ گوشتگ۔
آئی ءَ گوشتگ کہ چہ ایشی پیش ھم مسلم جون 2018 ءَ پاکستانی لشکر ءَ آوار جتگ ءُ بیگواہ کرتگ۔ بندیگی ءِ میان ءَ انچو آزار دیگ بوتگ کہ گوں نیم مرگ ءِ جاوراں نادراھجاہ ءَ برگ بوتگ۔ ما چہ وتی زراں کراچی ءَ برتگ۔ اود ءَ ڈاکٹراں گوشتگ کہ ایشی کٹگ شر نہ اَنت۔ چہ بازیں درمان کنگ ءَ پد جان دراہ بوتگ۔ یکبرے پد ءَ آوار جنگ ءُ بیگواہ کنگ بوتگ۔
کھول ءَ گوشتگ کہ ما پہ مسلم ءِ باروا سکا تکانسر ایں ءُ مارا پہ آئی زندگی ءَ ترس اِنت۔ ما گوں مردمی ھکانی ادارھاں لوٹ کن ایں کہ آ پہ مسلم ءِ آجوئی ءَ توار چست بہ کن اَنت ءُ دانکہ آجو بہ بیت۔
