شال: پہ زور بیگواھیں مردمانی پدجنگ ءَ وی بی ایم پی ءِ نیمگ ءَ شدکشیں زھرشانی گدان ءَ 5587 روچ سرجم بوتگ۔ پنچ شمبے ءِ روچ ءَ چہ جیکب آباد ( ھان گڑ) ءَ جسکم ءِ باسک وسیا اللہ، اللہ ڈنہ، اللہ رکہ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ شش بلوچ ورنا یک ھپتگے ءَ شھید بوتگ اَنت اے اولی بر نہ اِنت پیش ءَ ھم چوش بوتگ۔ شھیدی ءِ درچ برجاہ اِنت۔ انچو شھیدی جنگانی میان ءَ نہ بیت کہ انوں بلوچ بوگ ءَ اَنت۔ ھمک روچ ھونریچی بوگ ءَ اِنت، آوارجنی بوگ ءَ اِنت۔ زھگ چورہ بوگ ءَ اَنت، جنین جنوزام بوگ ءَ اَنت، پیرینانی کمک آیانی زھگ چہ آیاں پلگ بوگ ءَ اَنت۔
آئی ءَ گوشتگ کہ بلوچ یک نادزرسیں راجے اِنت، دژمن گندگ ءَ ایٹمی زورمندے اِنت، ما انچو نزوریں کہ وتی دیمپانی ءَ کرت نہ کن ایں یا بلوچ ءَ را وتی پھریزگ ءِ موکل نیست۔ چے بلوچ راج ایردستیں راجے اِنت پہ مدامی ایردست بیت یا نہ ؟ بلے لھتے انچیں مردم بنت کہ پہ آیانی مرگ ءَ کس گمیگ ءُ بژنیگ نہ بیت۔ آ ھما مردم اَنت کہ آیانی وتی زاتی واھشت کشتگ اَنت ءُ پہ وتی راجی پدریچ ءَ داں گڈی دم ءَ جھد کنگ ءَ اَنت۔ چے ھمے راجی بامرداں ھمے وڑیں وشھالی ءِ زندمان دوست نہ بیت، چے آیان ءَ مات، پت، گھار ءُ برات نیست؟
آئی ءَ گوشتگ کہ زورگریں پاکستان سرکار، ایپ سی، چیریں ادارہ ءُ آئی جوڑ کرتگیں کشندہ ٹولی ءِ دست ءَ شھید ءُ زور بیگواہ کنگ بوتگیں بلوچ پسگانی سیاسی ٹولی مردمی ھکانی سرگرمیں آدگہ گل ءُ میان استمانی تک ءِ پہ بلوچ راجی زرمبشت ءِ پلہ مرزی ءَ ڈنی ڈیھاں سروکاں ھوار سرجمیں راج ءِ بے مٹیں دیمونی ءُ جھدانی سوب ءَ مرچی بلوچ راجی زرمبشت وتی گوستانکی مھکی ءَ سر بوتگ۔
