الی شیر کرد سرمچارے ، نبشتہ کارے ءُ وکیلے بوتگ۔
بلوچ راجی زْرمبشت ( بی این ایم ) ءِ نیادے ءَ تْران کنان بی این ایم ءِ بنجاھی باسک چیپ اسلم ءَ گْوشتگ شھید الی شیر کرد راجی زْرمبشت ءِ تہ ءَ گلانی منوگریں مردمے اَت ءُ آئی ءَ کوشست کرتگ کہ جھد ءِ ھمک تک ءُ پھنات ءِ دیم ءَ برگ ءَ مردماں سرپدی بہ دنت ءُ وتی پلہ مرز جوڑ بہ کنت۔
اے نیاد شھید الی شیر کرد ءِ چاردھمی شھیدی سالروچ ءِ دم ءُ درگت ءَ چہ بی این ایم شہید راشد مشکے آواران ھنکین ءِ نیمگ ءَ ایر کنگ بیتگ۔
چیپ اسلم ءَ شھید الی شیر کرد ءِ زند ءُ کارانی سر ءَ دلجمی ءَ چمشانک دیان ءَ گْوشتگ الی شیر کرد 13 جنوری ، 1976 ءَ بولان ءِ ھند مچ ءَ ودی بوتگ ءُ بنداتی وانگ چہ ھمود ءِ مزنیں وانگجاہ ءَ در برتگ ءُ پہ دیمتر ءِ وانگ ءَ ایپ اے سی سائنس شھدربرجاہ شال ءَ شتگ ۔ دیم ءَ چہ بلوچستان زانشتجاہ ءَ ایم اے اسلامیات کرتگ چہ شال راھبندی زانشتجاہ ءَ ایل ایل بی ئِے ھم کرتگ۔
’’ شھید الی شیر کرد سکا وانندگ ءُ بھادریں جھدکارے اَت۔‘‘
آئی ءَ گْوشتگ چہ الی شیر کرد ءِ کار ءُ پنتانی پد ءَ آئی ءِ کھول ءِ دگہ مردم ھم گوں بلوچ زْرمبشت ءَ ھوار کپتگ اَنت۔ چہ آیاں شھید ممتاز الی کرد ، شھید الی جان کرد ءُ شھید شیر زمان کرد آئی ءِ ناکو زھگ اَت اَنت کہ چہ آئی ءِ شھیدی ءَ چندیں وھد ءَ پد شھید بوت اَنت۔
’’ شھید الی شیر کرد چہ نودربری زمانگ ءَ گوں بی ایس او ءَ بندوک بوت ءُ سیاست ئِے بندات کرت۔ 1999 ءَ بی ایس او ءِ بنجاھی پتر ءِ باسک بوت۔ ھمے وھد ءَ گوں بلوچ راجی راھشون ھیربکش مری ءِ ھک توار ءِ گردانک ءُ نیاداں گون بوت۔ بابو ابدالرھمان کرد ، زور بیگواھیں اھمد شاہ ءُ اسد مینگل ھم الی شیر کرد ءِ نزیک ءُ ھم لیکھیں ھمراہ بیتگ اَنت۔‘‘
دیمتر ءَ آئی ءَ گْوشت الی شیر کرد سرمچارے ، نبشتہ کارے ءُ وکیلے بوتگ۔ سھرائیں سیاست ءِ پڑ ءَ آ سوگھیں سیاسی سروکے بوتگ ءُ چیر اندری کارانی تہ ءَ سرمچار ءُ کماندارے۔
ھمے بنگپ ءِ سر ءَ ھنکین ءِ سرکماش استاد مھران ءَ ھم گپ جتگ ، آئی ءَ گْوشتک کہ آجوئی ءِ جھدے تہ ءَ بازیں مردماں وتی سر ءُ ساھانی دیمونی داتگ ، چہ ھرچ وڑیں سکی ءُ جنجالاں گْوستگ اَنت بلے انگت ادارہ جوڑ کنگ ءَ سوبمند نہ بوتگ اَنت پرچا کہ آ مردماں ادارہ ٹاھینگ ءِ جھد نہ کرتگ بلے لھتے انچیں جھدکار بہ اَنت کہ ادارہ جوڑ کنگ لوٹ اَنت ، آیاں ساز اَنت ءُ مھکم کن اَنت۔ الی شیر ھم چہ ھما جھدکاراں بوتگ کہ آیاں ادارھانی سرا کار کرتگ ءُ ادارھی بنیاد ءَ کار کنگ لوٹ اتگ۔ مروچی ھما سنگتانی کرتگیں کار ءُ دیمونیانی بنیاد ءَ بلوچ جھد دیم ءَ روان اِنت۔
آئی ءَ گْوشتگ پاکستانی چیریں واک آئی ایس آئی ءَ شھید الی شیر 21 ستمبر 2010 ءَ چہ آئی ءِ سیادے ءِ لوگ بیڑ برتگ ءُ آوار جتگ، سئے روچ آزار جاھاں دارگ ءَ پد 24 ستمبر آئی ءِ کنٹ چگل دات۔ آ ھمے سرپد بیتگ کہ آئی ءَ الی شیر کشتگ ءُ گار کرتگ بلے ما گند ایں کہ الی شیر ءِ سسا مروچی ھم گوں ما گون اَنت ءُ ما دیم پہ منزل ءَ روان ایں۔
مراگِش ءِ چارچینی ءِ ڈبہ ھنکین ءِ کمک سرکماش تلار ناز ءَ گون بیتگ اَنت ءُ گچینی مھمان چیپ اسلم بیتگ۔
