شال: پہ زور بیگواھیں مردمانی پد جنگ ءَ وی بی ایم پی ءِ شدکشیں زھرشانی گدان ءَ 5581 روچ سرجم بوتگ۔ پنچ شمبے ءِ روچ ءَ چہ ھزدار ءَ سیاسی ءُ چاگردی کارکن دین مھمد، نور الدین ءُ آدگہ مردم پہ ھمدردی درشان کنگ ءَگدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستانی لشکر، چیریں ادارہ ءُ کشندہ ٹولی ءِ کارمند انی دست ءَ شھید ءُ زور بیگواہ کنگ بوتگیں ھزارانی کچ ءَ مردمانی وی ایم پی پہ ھکاں کار ءَ اِنت۔ آدگہ گل ءُ میان استمانی تک ءَ بلوچ راجی زرمبشت ءِ پلہ مرزی ءَ دراں ڈیھ ءِ پرکاریں سروکاں ھوار سرجمیں راج ءِ بے دروریں دیمونی ءُ بازیں جھدانی سوب ءَ مرچی بلوچ راجی زرمبشت یک جوانیں گوستانکے ءَ سر کرتگ۔
آئی ءَ گوشتگ کہ مرچی جھان ءِ گیشتریں راج، ڈیھ ءُ ادارھانی تہ ءَ بلوچ راجی زرمبشت سر بوتگ، ھمے سوب ءَ بلوچ راجی زرمبشت ءِ نیمگ ءَ دلگوش دیگ ءَ اَنت۔
ماما کدیر گوشتگ کہ پہ پاکستان ءِ زوریں دستیگی ءَ ریاست ءِ کارانی دیمپانی ءَ کانودی سازی کنگ بیت بلوچ سیاسی سروک، باسک ءُ بلوچ میتگانی بگیری ءَ پاکستا نی لشکر ءُ چیریں ادارہ لشکر کشی ءِ پرمان ءَ دے اَنت۔ پاکستانی لشکر ءُ چیریں ادارھانی کارمند ءُ آیانی جوڑ کرتگیں کشندہ ٹولی وتن دوستیں بلوچ پسگاں نشانگ کنگ، دزگیریں مردمانی کشگ ءُ چگل دیگ ءُ زوریں بیگواھی ءُ مردمی ھکانی چیر دیگ ءِ جھد ءَکن اَنت۔ کشندھانی داشتگیں باسک چاریگی کن اَنت۔
