بلوچ آجوئی لوٹوکیں سروک ابدالنبی بنگلزھی ءَ وتی شنگ کرتگیں درشانے ءَ گوشتگ کہ منی ھمبل کماشیں سروک استاد واھد کمبر ءَ پنجاہ سال اِنت گوں بلوچ راجی زرمبشت ءَ ھمگرنچ اِنت۔ آ چہ نودربری ءِ زمانگ ءَ بگر داں انوں جتائیں جنگاں پرکار بوتگ۔ 2007 ءَ آئی ءَ پاکستانی لشکر ءَ آوار جتگ ءُ زور بیگواہ کرتگ، داں چاردہ ماہ ءَ چیریں آزارجاھاں آزار داتگ۔ پد ءَ آئی سر ءَ دروگیں بھتام جتگ ءُ داں دراجکشں وھدے ءَ زندانی کرتگ۔ بلے آئی سر ءَ جتگیں بھتام راست نہ بوتگ اَنت۔ آزارجاہ ءَ آزارانی اوپار کنگ ءُ مزن امری ءِ سوب ءَ استاد سکا نادراہ بوتگ۔ آئی ءَ یکشل ءَ درمان درکار بوتگ ھمے مول ءَ روکپتی بلوچستان ءَ نشتگ۔ اود ءَ پاکستانی چیریں ادارھاں وتی کمکارانی پارست ءَ استاد واھد کمبر آوار جتگ ءُ زور بیگواہ کرتگ۔ ریاست آئی دزگیری ءِ پدر کنگ ءُ آمیدگس ءَ پیش کنگ ءَ ابید ھزارانی کچ ءَ آدگہ بلوچانی وڑ ءَ زور بیگواہ کرتگ۔
آئی ءَ گوشتگ کہ استاد واھد کمبر ءِ زوریں بیگواھی میان استمانی کانودانی ناھکیں بگیری اِنت۔ اکوام متھدہ ءُ آدگہ میان استمانی گلانی مردمی ھکانی جارکشاں ھمک مردم ءِ کانودی پھریزگ ءِ ھک داتگ ءُ زوریں بیگواھی درکانودی لیک اِتگ۔ پاکستان ریاست ءِ نیمگ ءَ اے کانودانی یکشل ءَ پادمال کنگ ھمے گپ ءِ منانک اِنت کہ مردمی ھکانی بستار ءَ ھچ ارزیشت نیست۔
ابدالنبی بنگلزھی ءَ گوشتگ کہ ما گوں میان استمانی تک، مردمی ھکانی گل ءُ باسمائیں مردمانی گون ءَ لوٹ کن ایں آ استاد واھد کمبر ءِ پہ زوتیں آجوئی ءَ جوانیں گامگیج بزور اَنت۔ یک کماش ءُ نادراھیں سروکے ءِ اے وڑ ءَ بیگواہ کنگ نہ تیوک ءَ بلوچ راج بلکیں پہ سرجمیں جھان ءِ مردمگری ءَ ٹوھیں ویلے۔ پہ انساپ ءِ برجاہ دارگ ءُ مردمی ھکانی بگیری ءِ ھلاس کنگ ءَ میان استمانی تک ءَ مھکم ءُ ترندیں توار چست کنگ ھژدری اِنت۔
