⦿ بلوچستان ءَ مردمی اگبالانی جاور ءِ تہ ءَ شری ءِ گت ءُ گمان نیست۔
بلوچستان ءَ مردمی اگبالانی جاور بدتر بیتگ ، اگست ءِ ماہ ءَ 14 کس در آمیدگسی کشگ بیتگ ، چہ ایشاں دو درانڈیھ چہ پاکستانی سیمسراں ڈن روکپتی بلوچستان ءَ نشانگ کنگ ءُ کشگ بیتگ اَنت۔
بلوچ راجی زْرمبشت ( بی این ایم ) ءِ مردمی اگبالانی تْرامگیج ’ پانک ‘ ءَ وتی ماھی گزارش شنگ کرتگ۔ ایشی ءِ رد ءَ بلوچستان ءَ مردمی اگبالانی جاور ءِ تہ ءَ شری ءِ گت ءُ گمان نیست۔
گزارش ءِ رد ءَ ، اگست 2024 ءَ بلوچستان ءِ 11 ھنکینانی پجیگ ءَ ، چہ کراچی ءَ مردم زور بیگواہ کنگ بیتگ اَنت، چہ ایشاں درساں گیش 15 مردم چہ کیچ ءَ زور بیگواہ بیتگ ، چہ سرجمیں بلوچستان ءَ 44 کس پاکستانی لشکر ءُ گوں آئی ءَ بندوکیں تْرامگیجاں آوار جنگیں رنگے ءَ دزگیر کنگ ءَ پد زور بیگواہ کرتگ اَنت۔
پانک ءَ ھمے مردمانی نام ءُ نشان داتگ اَنت ءُ گْوشتگ ، چہ کزدار ھنکین ءَ پاکستانی لشکر ءَ 5 دزگیریں مردم دروگیں میڑاں کشتگ۔ چہ آواران ءَ ماسٹر ابدل ھالک ، چہ ڈنڈار کولواہ ءَ پنچ سالی ئیں ستارہ ھمے مردمانی تہ ءَ ھوار اَنت کہ تچکے ءَ پاکستانی لشکر ءَ کشتگ اَنت۔
27 اگست ءَ پنجگور ھنکین ءَ پرنٹیر کور (ایپ سی ) ءَ سجاد ءُ کامران نامیں دو ورنا وتی بنجل ءَ لوٹ اتگ ءُ آیاں انچیں منگ نامگے ءِ سر ءَ دزرند جنگ ءَ گْوشتگ کہ آئی ءِ رد ءَ دوئیں سلاھبندیں گلانی باسک اَنت ءُ سرینڈر بیگ ءَ اَنت ، چہ اے دروگیں منگ نامگانی سر ءَ دزرند جنگ ءَ انکار ءَ پد دوئیں ورنا چہ بنجل ءَ واترگ ءَ بیتگ اَنت کہ راہ ءَ کشتگ بیتگ اَنت۔
پانک ءَ پاکستانی سیمسر ءَ ڈن پاکستانی لشکر ءِ چیریں واکانی کارروائیانی سر ءَ بے تاھیری درشانتگ ، پانک ءِ گزارش ءِ رد ءَ 4 اگست ءَ بلوچستان ءِ ھنکین آواران ءِ نندوک ’ سابر ء دادشاہ ‘ ماں سراوان ، روکپتی بلوچستان ءَ پاکستانی لشکر ءِ چریکاں کشتگ ، دگہ کارروائی یے 28 اگست ءَ روکپتی بلوچستان ءِ ھند دشتیاری ءَ بیتگ ، اے کارروائی ءَ گومازی ، تمپ ، کیچ ءِ نندوک ’ اکتر ء مھمد ‘ کشگ بیتگ۔
گزارش ءِ رد ءَ ، روکپتی بلوچستان ءَ یکشل ءَ نشانگ کنگ ءُ کشگ بیتگیں وانڈوئیں بلوچ چہ راھبندی ، آئینی ءُ چاگردی پانک ءَ زبھر اَنت چہ ایشی ءَ اے بے ڈیھیں مردمانی زندمان چہ بد ءَ بدتر بیتگ۔ اے جیڑہ ءِ نیمگ ءَ باز بر ءَ دلگوش پرینگ بیتگ ، بلے میان استمانی تْرامگیج ءُ ھمے رد ءَ کار کنوکیں واکدار اے مردمانی مردمی بنیاد ءَ کمک ءَ کرت کنگ ءَ نہ اَنت۔
پانک ءَ لوٹ اتگ، درانڈیھیں بلوچ اوگانستان ءُ ایران ءَ راھبندی رنگے ءَ درانڈیھ منگ بہ بہ اَنت ءُ مردمی اگبالانی میان استمانی تْرامگیجانی چیردستی ءَ پانکجنی اش بہ بیت۔ انچوش کہ اوگانستان ءِ جیڑھانی میان ءَ اوگان درانڈیھ ایران ءُ پاکستان ءَ درانڈیھ ءِ بستار من اِت اَنت ءُ پہ آیاں مردمی بنیاد ءَ کمک ءِ راہ ءُ رسانک پچ کرت۔ ھمے پیم بلوچ درانڈیھاں ھم ھمے بستار دیگ ءُ آیانی اگبال دیگ بہ بیت ءُ پاکستانی لشکر ایران ءُ اوگانستان ءِ سیمسرانی تہ ءَ اے کارروائیانی سر ءَ جست ءُ گر ءُ دار بہ بیت۔
نام گپتگیں گزارش ءِ تہ ءَ گْوشگ بیتگ کہ زور بیگواھیں مردم چہ در کپگ ءَ پد ھم پھریز نہ اَنت ، بلوچستان ءِ ھنکین کیچ ءِ بنجاھی شھر تربت ءَ ورنایے ’ آبد ء وشدل ‘ پاکستانی لشکر ءِ مردم کشیں چیرکاں تیر جتگ ءُ ٹپی کرتگ۔ آبد ، 21 مارچ 2023 ءَ پاکستانی لشکر ءِ دست ءَ زور بیگواھی ءَ پد یلہ بیتگ اَت۔
گزارش ءَ گْوشگ بیتگ کہ پیش ءَ ھم انچوش بیتگ کہ زور بیگواھی یا چہ آمیدگس ءَ یلہ بیتگیں مردم، پد ءَ زور بیگواہ یا درآمیدگسی کشگ بیتگ اَنت۔ نشانگیں کوش ھم ماں بلوچستان ءَ پاکستانی لشکر ءِ رپک ءُ راھے کہ چہ ایشی ءَ آ ھما مردماں کش ایت کہ آئی ءَ چوناھیں ھم نیمونے ءَ نادوست اَنت۔
پانک سوج کنت کہ زور بیگواھی ءِ آماچیں مردمانی پہ سسا ءُ سما ءِ گھتری ءُ جاندْراھی، جان ءُ مڈی ءِ پھریز ءُ چاگرد ءِ تہ ءَ آیانی پسیرگیں پیم ءَ انچائیں شھرمنندانی بستار ءَ زند گوازینگ ءِ الم کنگ ھژدری اِنت ، اے رد ءَ مردمی اگبالانی تْرامگیجاں کار کنگ لوٹ ایت۔
