بلوچ یکجھتی کمیٹی ءِ جارکش ءَ گوشتگ کہ گوستگیں روچ ءَ سرکار ءِ نیمگ ءَ ریاستی لشکر ءَ بلوچستان ءَ ھمک شکی ئیں مردم ءِ دزگیر کنگ ءُ داں سے ماہ ءَ ابید ٹرائل ءَ زندان ءَ بند کنگ ءِ واک دیگ بلوچ چکچینی ءَ کانودی نیمون پیش کنگ ءُ اے کار ءِ تیز کنگ ءِ شوربندی اِنت۔ بزاں کہ پہ اے کار ءَ ریاستی لشکر ءَ پیسر ءَ ھم واک دیگ بوتگ ءُ ابید ءِ کانودی کاروائی ءَ چونیں ھم بلوچے زور بیگواہ کنگ ءُ داں ماہ ءُ سالاں ابید کانود ءَ چیریں آزارجاھاں بند کنگ ءِ اے کار چہ سالاں برجاہ اِنت۔
آئی گوشتگ کہ بلوچستان ءَ ھمک روچ چہ مکران ءَ بگر داں کوہ ءِ سلیمان ءَ بلوچ زوریں بیگواھی ءِ نشانگ کنگ بوگ ءَ اَنت۔ چوشیں روچے نہ گوز ایت کہ یک بلوچے زور بیگواہ کنگ مہ بیت، وتگڑیں لبز ” مشتبہ “ ءِ کارمرز کنگ بلوچستان ءَ اے کار ءَ تیز کنت ءُ بلوچانی زوریں بیگواھی ءَ کانودی نیمون پیش کنگ اِنت۔
جارکش ءَ گوشتگ کہ بلوچستان اے وھد ءَ زوریں بیگواھی ءِ باروا جھان ءِ گنتریں دمگ اِنت، اود ءَ ھمک روچ یکے ءَ گیش بلوچ زور بیگواہ کنگ بیت۔ نوں سرکار ءَ وتی زوراکی ءِ شوربندیانی رد ءَ ریاستی لشکر ءَ راھبندی ءُ کانود ءِ پارست ءَ سرجم ءَ واک دیگ ءِ جھد ءَ کنگ ءَ اِنت۔ دانکہ اے درسیں زوراکیاں کانودی بستار ءَ بہ کنت۔
آئی ءَ گوشتگ کہ سرکار ءِ اے سوڑگ مارا بلوچستان ءَ پہ مردمی ھکانی بگیریانی باورا گیشتر پریشان کنت۔ ما سرپد بہ ایں کہ اے وڑیں گامگیج بلوچستان ءَ مردمی ھکانی لپاشگ ءِ باروا جھان ءِ گنتریں دمگ جوڑ کنت ءُ ایشی آسر ءَ لکانی کچ ءَ مردم زوریں بیگواھی ءِ آماچ بیت۔ ما گوں مردمی ھکانی ادارھاں لوٹ کن ایں کہ آ اے سوڑگ ءِ بگیری ءَ زوت توار چست بہ کن اَنت۔
