بلوچستان آجوئی سنگر ( بی ایل ایپ ) ءِ جارکش ءَ میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں سے جتائیں اُرشاں سے جتائیں جاھاں ریاستی کمکار ءُ دو موبائل ٹاورانی سر ءَ تیرگواری ءَ پد مانداشتگ اَنت۔ پنچ ستمبر ءَ پنچ شمبے ءِ ادار ھشت ءَ زھری ھزدار ءِ شھدگ ءِ سر ءَ ریاستی کمکار ندیم الی مھمد ءَ نشانگ کرتگ۔ تیرگواری ءِ زد ءَ کپگ ءَ ریاستی کمکار ٹپی بوتگ۔
آئی ءَ گوشتگ کہ اے مردم ریاستی کمکارے کہ آ شھید نور الھک پنام بارگ ء تاھر اھمد ءُ شھید زیا الرھمان پنام دلجان ء ابدرسول ءِ شھیدی ءَ ھوار بوتگ۔ اے کمکار ءَ 19 پروری 2018 ءَ زھری تراسانی ءَ وتی ھمبل زپر اللہ تراسانی،ھپیز تراسانی ءُ ماسٹر سنا اللہ تراسانی ءِ ھمراھی ءَ گوں پاکستانی لشکر ءَ شریدار بوتگ اَنت۔
جارکش ءَ گوشتگ کہ اے مردم نشان کنگ بوتگ اَنت کہ آیاں 19 پروری 2018 ءَ زھری ءَ پاکستانی لشکر ءِ ھواری ءَ شھید نور الھک پنام بارگ ءُ شھید زیا الرھمان پنام دلجان شھید کناھینتگ اَنت۔ زوت درسیں میارباراں نشانگ کن ایں۔
آئی ءَ گوشتگ کہ دگہ یک کاروائی یے ءَ سرمچاراں سے ستمبر ءَ شپ ءِ ھشت ءَ بگاؤ بارکان ءِ ھند بکرانی ءَ یوپون ٹاور تیرگواری کنگ ءَ پد مانداشتگ تباہ کرتگ۔
جارکش ءَ گوشتگ کہ سیمی کاروائی ءَ سرمچاراں چار ستمبر ءِ بیگاہ ءِ پنچ ءَ موساکیل ءِ ھند کنگری ءَ ٹیلی نار ٹاور گوں تراک ءَ دور دیگ ءَ پد مشین ءُ سامان مانداشتگ اَنت۔
آئی ءَ گوشتگ کہ پاکستانی لشکر ءُ آئی کمکار بلوچ راج ءِ دژمن اَنت، اے درسیں کماراں نشانگ کن ایں کہ آیاں بلوچ گوں ریاستی لشکر ءِ ھواری ءَ بیگواہ کناھینتگ اَنت ءُ تچکی ءَ شھید کناھینگ ءَ لشکر ءِ ھمراہ بوتگ اَنت۔
جارکش ءَ گوشتگ کہ پاکستان گوں وتی رھوتی نزام ءِ پارست ءَ داں بلوچ سرمچاراں سر بوگ ءُ آیانی موبائلانی ٹریس کنگ ءِ بے سوبیں جھدے کنگ ءَ اِنت۔ بلے گل ءِ سرمچار ءُ چیریں بھرگ مدام ھمک ھما شوربندی ءَ بے سوب کنگ ءَ اَنت کہ آیانی مول سرمچارانی تاوان دیگ بہ بیت۔
میجر گھرام ءَ اُرشانی زمہ واری منّ اِتگ اَنت ءُ گوشتگ کہ داں بلوچستان ءِ آجوئی ءَ ھمک ھما شوربندی ءَ تباہ کن ایں کہ آئی مول بلوچ راج ءِ لٹ ءُ پول کنگ بہ بیت۔
