روکپتی بلوچستان: زی 3 ستمبر 2024 ءَ ماں چھبار ءِ بندنی شھر منتکہ آزات ءِ میان استمانی دیوانجاہ ءَ بلوچی زبان ءِ کلانھیں لچّہ کار،جُھدکار ءُ تاکار استاد آبد آسکانی ءِ درگت ءَ بیگاہ ءِپنچ ءَ پُرسی دیوانے برجم دارگ بوتگ، دیوان بُنگیج گوں واجھیں کار محمد اسلم ءِ کُران وانی ءَ بوتگ۔
دیوان جارچینی ءِ زمہ واری ابدالوھاب ایران نژاد ءُ الی بکش دشتیاریءَ گوں بوتگ اَنت ۔ دیوان دو بھرانی تہ ءَ برجم دارگ بوتگ۔
دیوان ءِ بنداتی بھر گُشتانکی بھربوتگ۔ الی بکش دشتیاری ءَ دیوان ءِ نندوکیں مردم وش آتک کرتگ اَنت ءُ چیزے بند چہ استاد آبد آسکانی ءِ لچھے ءَ دپگال کرتگ۔
چہ ایشی پد دادکریم باشندہ ءَ استاد آبد آسکانی ءِ درگت ءَ تْران کنان ءَ گْوشت کہ اے دھر ءَ پہ ما ابید درد ءُ رنج ءَ دگہ چیزے گون نہ اِنت کہ بلوچی زبان ءِ ھستی یک ءَ یک ءَ روان انت ءُ اے مزنیں تاوان اَنت پہ بلوچی زبان ءَدیمتر ءَ استاد آبد آسکانی ءِ ازم ءُ جُھدکاری ءِ درگت ءَ گپ ئِے جَت ۔ ھالد بادپا ءَ ادستاد آبد آسکانی ءِ درگت ءَ لچھے پہ دیوان ءَ ندر کرتگ۔
دیمتر ءَ استاد برکت برجان ءَ استاد آبد آسکانی ءِ درگت ءَ وتی ھیال درشان کُت انت ءُ یک لَچّھے ھم استاد ءِ درگت ءَ درشان کرتگ ءُ گْوشت کہ اگاں سید رھبند ءَ مئے ھَند ءُ دَمگ ءَ دیمروئی کُتگ گُڑا استاد آبد آسکانی ءِ بے دروریں کرد انت ۔
دوست مھمد بلوچ ءَ وتی ھیال استاد آبد آسکانی ءِ درگت ءَ درشان کرتگ اَنت ۔بانُک ھُمیرا ریگی ءَ گوشتگ استاد آبد ءِ کتابے چاپ کنائیناں ۔ابدالکادر پُربار ءَ استاد آبد آسکانی ءِ درگت ءَ وتی ھیال درشان کرتگ اَنت ءُ استاد آبد آسکانی ءِ بیرانی ءَ دلپدردی درشان کرتگ۔ ھامد ساھل ءَ مولوی یوسپ انیس ءِ پِربندے دیوان ءَ پیش کرتگ۔
چہ ایشاں پددیوان ءَ آتکگیں آدگہ مردماں استاد آبد آسکانی باروا وتی ھیال درشان کرتگ اَنت۔
