اسلام آباد:بلوچستان نیشنل پارٹی (بی این پی) ءِ سروک اکتر مینگل چہ پاکستان ءِ پارلیمان ءَ دزکشی ءِ جار جتگ۔
اسلام آباد ءَ اکتر مینگل پریس کانپریس کرتگ ءُ گوشتگ کہ من مرچی چہ پارلیمنٹ ءَ دزکشی ءِ جار ءَ جن آں، اے گپ من کس ءَ نہ گوشتگ بلے مرچی اے پریس کانپریس ءَ گوشگ ءَ آں۔
اکتر مینگل ءَ گوشتگ کہ من پہ وتی مردماں ھچ کرت نہ کرتگ، بلوچستان ءِ جاور چارتگ اَنت ءُ اے سوڑگ کرتگ۔ من ریاست، مھتر ءُ مزن وزیر ءِ سر ءَ بیسہ نہ کن آں، سرجمیں نزام ءِ سر ءَ بیسہ نہ کن آں۔
آئی ءَ گوشتگ کہ بلوچستان ءِ جیڑہ ءِ سر ءَ مردم دلگوش نہ اَنت، من پہ وتی مردماں ھچ کرت نہ کرتگ، ھمک وھد ءَ اے جیڑہ ءِ سر ءَ گپ بہ کن مان آرگ نہ بیت۔ پہ ڈیھ ءَ بس سرکار ءِ نام پشت کپتگ۔ چہ اے سیاست ءَ گھتر اِنت کہ من پکوڑہ ءِ دکانے پچ بہ کن آں۔ 65 ھزار ووٹ دیوک اچمن دلگراں بنت من چہ آیاں پھلی لوٹ آں۔
اکتر مینگل ءَ چاگرردی رسانکدر ءِ تندجاہ ءَ وتی ھیال درشان کرتگ اَنت ءُ گوشتگ کہ من وتی پت سردار اتا اللہ مینگل ءِ بیرانی ءِ سیمی سالروچ ءِ درگت ءَ آئی ءَ ستک شانی ندر کن آں ءُ چہ پارلیمنٹ ءِ باسکے ءَ دزکش باں۔ من اکتر مینگل چہ پارلیمنٹ ءِ باسکی ءِ اگدہ ءَ دزکش باں۔
آئی ءَ گوشتگ کہ بلوچستان ءِ انوگیں جاوراں من ءَ پہ اے گامگیج زورگ ءَ لاچار کرتگ، مئے استان مدام ایوان ءِ نیمگ ءَ مان آرگ نہ بیت۔ ھمک روچ ما پشت ءَ چگل دیگ بہ ایں۔ چہ ایشی مارا وتی کرد ءِ سر ءَ چارگ ءَ ابید دگہ ھچ راہ نیست۔ اے پارلیمان ءَ بلوچستان ءِ مردمانی ھکی ئیں جھگیر نہ بوگ ءِ سوب ءَ منی وڑیں توار پہ گھتری ءَ ھچ ارزیشت نہ دار ایت۔
اکتر مینگل ءَ گوشتگ کہ اے گپ تچک اِنت مئے زھرشانی یا سلاہ دیگ ءَ مدام گوں بگیریاں دیمپانی کنگ بیت۔ مئے مردم بے توار کنگ بنت یا آ راجدروہ لیکگ بنت۔ یا کشگ بنت۔ اے وڑیں جاورانی تہ ءَ من اے نودناکی ءِ پارست ءَ دیمتر ءَ کار کنگ ءَ بے نپ سرپد باں۔ پمیشکا کہ اد ءَ منی ساڑی بوگ، منی جھگیری مردمان ءَ نپ دات نہ کنت۔
آئی ءَ گوشتگ کہ من ھمے لوٹ ءَ کن آں کہ منی اے دزکشی ءَ بہ من اِت۔ پاکیں ھاوند بلوچستان ءِ پھازداری ءَ بہ کنت ءُ آئی وشھال بہ کنت۔
