بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ کہ بلوچستان ءَ ژانگولیں لاشانی دزکپگ ءِ درچ تیز کنگ بوتگ۔ چہ بلوچستان ءِ جتائیں ھنداں باز ژانگولیں لاش دزکپتگ اَنت، چہ آیاں چار پجارگ بوتگ اَنت کہ آیانی تہ ءَ پیاز جتک، نسار اھمد زھری، نئیم اھمد ءُ سئید اھمد ھوار اَنت۔ چہ ایشاں ابید آدگہ لاش انگت ءَ پجارگ نہ بوتگ اَنت۔
آئی ءَ گوشتگ کہ بلوچستان ءَ یکبرے پد ءَ ناھکی ءُ زوراکی تیز کنگ بوتگ اَنت۔ ریاست چکچینی ءِ شوندات ءَ ھچ وڑ ءَ ھلاس کنگ ءَ جاڑیگ نہ اِنت۔ چہ ریاست ءِ زوراکی ءِ شوندات ءَ ھمے گپ پدر اِنت کہ ریاست بلوچستان ءَ تیوک ءَ زور ءُ زوراکی کنگ ءِ سر ءَ سدک اِنت۔ اے شوندات ءَ بلوچستان ءَ پہ مردمگری ءَ تباھی یے ودی کرتگ۔ اود ءَ یک روچے باز ورنا کشگ ءُ آیانی ژانگولیں لاش چگل دیگ بیت۔
آئی ءَ گوشتگ کہ ما گوں مردمی ھکانی گلاں لوٹ کن ایں کہ بلوچستان ءَ مردمی ھکانی ناھکیں بگیریانی سر ءَ زوت گامگیج بہ زور ایت۔ ریاست پاکستان ءِ زوراکیانی شوندات ءِ سوب ءَ بلوچستان ءَ لکانی کچ ءَ پہ مردمانی زندگیاں ترس اِنت۔
