بیگواھیں بلوچانی توار ( وی بی ایم پی ) ءِ کارگشاد سمی دین ءَ ماں چاگردی رسانکدر ایکس ءَ نبشتگ کہ چہ زوریں بیگواھیاں سانمندیں مردمانی میان استمانی روچ ءِ درگت ءَ ھمک سال ءِ وڑ ءَ اے رندی ھیومن رائٹس کمیشن آپ پاکستان ءَ ھوار جتائیں سیاسی، چاگردی ءُ مردمی ھکانی گلانی نیمگ ءَ پاکستان ءَ بیوکیں زوریں بیگواھیانی بگیری ءُ پہ زور بیگواھیں مردمانی آجوئی ءَ زھرشانی روانکے کشگ بیت۔
سمی دین ءَ گوشتگ کہ درسیں بھرگاں سیادی داروکیں مردمانی گون ءَ لوٹ کن ایں کہ باندا روانک ءَ بھر بزور اَنت ءُ زوریں بیگواھیانی بگیری ءَ توار چست بہ کن اَنت۔
آئی ءَ گوشتگ کہ 30 اگست آدینگ ءِ روچ ءَ بیگاہ ءِ سے ءَ چہ تین تلوار ءَ داں کراچی پریس کلب ءَ روانک کشگ بیت۔
