کیچ: زورگریں پاکستانی لشکر ءَ تربت زانشتجاہ انگر کرتگ ءُ جنکانی وابجاہ ءَ بیڑ برتگ ءُ شھید پدائی ماھل ءِ کوٹی پٹ اِتگ۔
نودربرے ءِ گوشگ اِنت کہ پاکستانی لشکر ءُ چیریں ادارھانی کارمنداں زانشتجاہ ءَ بیڑ برگ ءِ میان ءَ چہ نودربراں شھید پدائی ماھل پنام زلان کرد ءِ باروا جست کرتگ ءُ آئی کوٹی پٹ اِتگ۔
آئی ءِ گوشگ اِنت کہ لشکر ءُ چیریں ادارھانی کارمنداں چہ بازیں نودربراں جتا جتا شھید پدائی ماھل ءِ باروا جست گپتگ۔ آیاں چہ ماھل ءِ ساڑی بوگ ءُ زندمان ءِ باروا ھم جست ءُ پرس کرتگ۔
زورگریں پاکستانی لشکر ءَ پٹ ءُ پول ءِ میان ءَ چہ ماھل ءِ کوٹی ءَ بازیں سامان زرتگ ءُ برتگ اَنت۔
یات بہ بہ اِت کہ شھید پدائی ماھل پنام زلان کرد گْوادر ءِ جاہ منند اِنت ءُ تربت زانشتجاہ ءَ کانود ءِ نودربر اِنت۔
