بلوچ یکجھتی کمیٹی ءِ سروک ڈاکٹر ماہ رنگ ءَ آدینگ ءِ روچ ءَ شال ءَ ھیومن رائٹس کمیشن پاکستان ءِ چیردستی ءَ برجم داشتگیں دیوانے ءَ تران کرتگ ءُ گوشتگ کہ ما بلوچستان ءَ ھوار ھمک نزوریں راج ءِ زرمبشت ءِ پلہ مرزی ءَ کن ایں، ما اے نہ چار ایں کہ اے مئے زرمبشت نہ اِنت، ھزارہ ءُ پشتونانی زرمبشت بہ بیت یا کہ مزدورانی زرمبشت بہ بیت ما ھواری ءَ جھد کن ایں۔ ما کہ ھمے چاگرد ءَ ما زند گوازینگ ءَ ایں اے تباہ بوتگ۔ اد ءَ چہ ھمک نزوریں راج ءَ ھوار ھمک مردم ءِ بنیادی ھک پلگ بوتگ اَنت۔
آئی ءَ گوشتگ کہ ریاست پمیشکا جوڑ کنگ بہ بنت آ شھریانی پھازداری ءَ بہ کن اَنت، اگاں چہ ریاستاں مردمانی ھمگرنچی ھلاس بوت گڑا ھچ پشت نہ کپ ایت۔ لس مردم ریاست ءَ برجاہ دار اَنت، زور لس مردمانی بیت۔ جیڑہ ھمیش اِنت کہ لس مردم دارگ بوتگ اَنت اے چوش نہ زان اَنت کہ توان ھمیش اَنت۔
ڈاکٹر ماہ رنگ ءَ گوشتگ کہ مرچی بلوچستان ءِ ھمک بھرگ زوراکیانی آماچ اِنت۔ آ گوں راجی زرمبشت ءَ ھمگرنچ بہ بنت یا مہ بنت زوراکیانی آماچ کنگ بنت۔ بلے اے گپ ءَ کس نہ کنت پمیشکا کہ درس ریاست ءَ دست ءِ چیر ءَ داشتگ اَنت، رسانکدر ھم ریاست ءِ چیردست اِنت۔ بلوچ یکجھتی کمیٹی پمیشکا پہ ریاست ءِ سر دردےجوڑ بوتگ کہ آئی وتی سیاسی راھبندانی سر ءَ ھچ وڑ ءَ سودا نہ کرتگ ءُ دیم ءَ ھم نہ کنت۔
آئی ءَ گوشتگ کہ ما ریاست ءِ ھمک زوراکی جھان ءِ دیم ءَ آوارتگ۔ ریاستی زوراکیاں یک زھرشانی یے ءَ زرمبشتے جوڑ کرتگ۔ بلوچستان ءَ لشکری کانود برجاہ اِنت کہ آ کجام وڑ ءَ بلوچستان ءَ بند بہ کنت۔ آئی کجام وڑ ءَ گْوادر 27 جولائی ءَ داں دہ اگست ءَ انگر کرتگ۔ گْوادر ءَ یک جنینے گریوگ ءَ بوتگ ءُ آتکگ کہ پاکستانی لشکر ءَ آئی گس ءِ پٹ ءُ پول کنگ ءِ میان ءَ آئی جنک ءِ سور ءِ سھر، زر ءُ آدگہ سامانانی ھواری ءَ پریج ھم برتگ۔
ڈاکٹر ماہ رنگ ءَ گوشتگ کہ مارا بلوچ، پشتون، ھزاراہ ءُ ھمک نزوریں راجانی میان ءَ ھم پتی ودی کنگ لوٹ ایت۔ بلوچ یکجھتی کمیٹی راجمستری سیاست ءُ راھبندی جھد ءِ سر ءَ دلجم اِنت۔ بلے چہ ریاست ءَ ھمے جست اِنت کہ آ کدی راجمستری بیت، آ مارا ھمے بہ گوش ایت کہ آ راھبند ءِ کجام شِک ءَ بلوچستان ءِ تہ ءَ کاروائی کنگ ءَ اِنت؟
آئی ءَ گوشتگ کہ گْوادر ءَ ایپ سی ءَ زوراکی کرتگ، مردم جتگ اَنت بلے ایپ سی ءِ سر ءَ ایپ آئی آر کنگ نہ بوتگ، آیانی جھد ھمیش اِنت کہ ما زوراکی بہ کن ایں۔ مرچی ھم مئے سنگت ءُ دوزواہ گوں جتائیں وڑ ءُ پیماں ترسینگ بوگ ءَ اَنت۔ مارا درساں جھد کنگ لوٹ ایت۔ مرچی بلوچستان ءَ گھگیری کنگ بوگ ءَ اِنت ءُ مردم رھشون بوگ ءَ اَنت۔ روز گوں ریاست ءَ نہ اِنت گوں لس مردماں اِنت۔
