شال: پاکستانی لشکر ءِ دست ءَ زور بیگواھیں ڈاکٹر ابدالھی ءِ کھول ءِ نیمگ ءَ آئی یل نہ کنگ ءِ بگیری ءَ زھرشانی روانکے کشگ بوتگ۔ سے شمبے ءِ روچ ءَ زھرشانی روانک چہ بلوچستان زانشتجاہ ءِ دیم ءَ درکپتگ ءُ جتائیں جاھاں ترّ ءُ گرد کنگ ءَ پد شال پریس کلب ءِ دیم ءَ مچ بوتگ اَنت۔
زھرشانی روانک ءَ زور بیگواھیں ڈاکٹر ابدالھی ءِ کھول ءِ ھواری ءَ آدگہ جتاھیں بھرگاں سیادی داروکیں مردماں بازیں کچے ءَ بھر زرتگ۔ آیاں زور بیگواھیں مردمانی اکس گوں بوتگ اَنت ءُ زوریں بیگواھی ءِ بگیری ءَ اوگام اِش جتگ۔
زھرشانی ءَ زور بیگواھیں ڈاکٹر ابدالھی ءِ گھار بکتاور ءَ تران کرتگ ءُ گوشتگ کہ منی برات یک جون 2024 ءَ ریاستی لشکر ءَ آوار جتگ ءُ بیگواہ کرتگ، سے ماہ ءِ گوزگ ءَ پد ھم آئی ھچ وڑیں ھال نیست۔
آئی ءَ گوشتگ کہ منی برات سرکاری نوکرے ءُ آ آواران ءَ وتی نادراھجاہ ءَ بوتگ کہ پاکستانی لشکر ءَ آوار جتگ ءُ بیگواہ کرتگ۔ اگاں آئی سر ءَ چونیں بھتام ھست گڑا آمیدگس ءَ پیش کنگ بہ بیت، اگاں بے میار اِنت گڑا یل کنگ ءُ مئے کھول چہ گرانیں درداں آجو کنگ بہ بیت۔
آئی ءَ گوشتگ کہ سرکار ءِ نیمگ ءَ پہ زور بیگواھیں مردمانی کھولاں زر ءِ پیش کنگ کھولانی ٹپانی سر ءَ واد پریچگ اِنت کہ آ چہ سالاں پہ وتی زور بیگواھیں آزیزانی آجوئی ءَ جھد کنگ ءَ اَنت۔ اگاں سرکار چیزے دات کنت گڑا زور بیگواھیں مردمانی کھولانی گون ءَ انساپ بہ کنت۔
