واھد کمبر ءَ وتی سرجمیں زند بلوچستان ءِ سر ءَ پاکستان ءِ زورگری ، ناراھی ءُ زوراکیانی بگیر ءَ جھد ءَ گوازینتگ ، بلوچ راج آئی ءِ سھرا کنگ ءِ لوٹ کنت
بلوچ راجی زْرمبشت ( بی این ایم ) ءِ جارکش ءَ وتی درشان ءَ گْوشتگ واھدبکش پنام استاد واھد کمبر ء آلی ’ بلوچ راجی آجوئی ءِ زْرمبشت ‘ ءِ سروکے ، کہ پاکستان ءِ چیریں واکاں 19 جولائی 2024 ءَ چہ ھمساھگیں ڈیھ ایران ءَ آوار جنگ ءَ پد زور بیگواہ کرتگ۔استاد واھد کمبر ءَ وتی سرجمیں زند بلوچستان ءِ سر ءَ پاکستان ءِ زورگری ، ناراھی ءُ زوراکیانی بگیر ءَ جھد ءَ گوازینتگ۔ آئی ءِ آوار جنگ ءُ زور بیگواھی ءِ بگیر ءَ سرجمیں راج ھم توار اِنت ءُ آئی ءِ سھرا کنگ ءُ آئی ءَ راھبندانی رد ءَ اگبال دیگ ءِ لوٹ ءَ کنت۔
جارکش ءَ گْوشتگ استاد واھد کمبر پہ وتی سیاسی من ءُ مولاں تچک اِنت ءُ آئی ءِ جھد چہ کس ءَ چیر نہ اِنت۔ زورگری ءُ نوک آبادی تْرام ءِ بگیری ءَ راجی آجوئی ءِ زْرمبشت ءُ آجوئی ءِ جنگ ءِ بارہ ءَ میان استمانی راھبندانی رد ءَ اے آئی ءِ راھبندی ءُ مردمی اگبال اِنت کہ زندانی ءِ بستار ءَ سھرا کنگ بہ بیت ءُ آئی ءِ راھبندی ءُ مردمی اگبال منگہ دیگ بہ بہ اَنت۔ زانگ بہ بیت کہ چد ءُ پیش ھم استاد واھد پاکستانی لشکر ءِ دست ءَ در آمیدگسی دزگیر ، زور بیگواہ ، آزار دیگ ءُ دروگیں بھتاماں زندان بیگ ءَ پد یلہ بیتگ اَت، یلہ بیگ ءَ پد چیر بیتگ ءُ پہ زورگپتیں بلوچستان ءِ آجوئی ءَ سروکی ءِ کرد ءَ پیلو کنگ ءَ اَت۔
چہ میان استمانی ریڈکراس ءِ زمہ واراں لوٹ کنان گل ءِ جارکش ءَ گْوشتگ میان استمانی راھبند پہ جنگی زندانیاں تچک ءُ گیش اتگ اَنت پمیشکا ما اے رد ءَ کار کنوکیں تْرامگیج ءَ لوٹ ایں کہ آ استاد واھد کمبر ءَ جنگی زندانی منارینگ ءُ آئی ءِ سھرا کنائینگ ءَ وتی کرد ءَ پیلو بہ کنت۔
جارکش ءَ گْوشتگ استاد واھد کمبر پیریں مردمے۔ ھالانی رد ءَ آ دل ءِ نادْراھی ءِ پجیگ ءَ بازیں نادْراھیانی آماچ اِنت پہ ایشی ءَ المی اِنت کہ آئی ءَ مدام ڈاکٹر بہ چار اَنت ءُ دارگ ءُ درمان بہ دے اَنت۔ ریڈ کراس پہ آئی ءِ زیتیں سھرائی ءَ وتی کرد ءَ پیلو بہ کنت ءُ اے گپ ءَ الم بہ کنت کہ آئی ءِ کھول ءِ مردم گوں آئی ءَ دوچار بہ کپ اَنت۔ اے کار ءَ دیرکنگ پہ آئی ءِ زندگی ءَ تاوان اِنت۔
جارکش ءَ گْوشتگ بلوچستان ءِ سر ءَ پاکستان ءِ زورگری ءِ بگیری ءَ بلوچ راجی آجوئی زْرمبشت راستی یے ایشی ءَ پاکستان بھ چیر دات نہ کنت۔ پاکستان بلوچ آجوئی ءِ زْرمبشت ءِ دیم ءِ دارگ ءَ سیاسی ءُ جنگی سنگر ءَ بے سوبی ءَ پد بلوچ راج ءِ بگیری ءَ چکچینی رنگیں درانسانی کار کنگ ءَ اِنت۔ میتگانی سر ءَ بم گواری،میتگ ءِ مردمانی پہ زور لڈینگ ، لوگ ءُ مڈیاں سوچگ ، مردماں زور بیگواہ کنگ ، چیریں آزار جاھاں لٹ دیگ ، زندانی ئیں مردماں درآمیدگسی کشگ ءَ پد ژانگولیں کنٹانی چگل دیگ، دروگیں میڑاں زندانی ئیں مردماں کشگ پاکستان ءِ بلوچ چکچینی ءِ میارباریں کارپدانی تہ ءَ ھوار اَنت۔
پاکستان ءِ چکچینی ءِ کارروائی ایوک ءَ زورگپتگیں بلوچستان ءَ نہ اَنت بلکیں پاکستانی زوراکی ءُ چکچینی ءِ پد ءَ لڈ اتگیں بلوچ سرجمیں جھان ءَ پاکستان ءِ اے درانسانی شونداتانی نشانگ بیگ ءَ اَنت۔پاکستانی چریکانی دست ءَ واھد کمبر ءِ آوار جنگ ءِ انگیں ویل ءَ پیش بی ایس او آزاد ءِ پیسرگیں سرکماش لمہ کریمہ ماں کینیڈا ءَ ، نامی ئیں بلوچ اھوالکار ساجد ھسین ماں سویڈن ءَ ، بالاچ مری ، استاد اسلم ، چنکا میر ابدالنبی بنگلزھی، انجینئر ابدل رزاک ءِ پجیگ ءَ بازیں بلوچ راھشون ءُ ماں اوگانستان ءَ درانڈیھیں بلوچ پاکستانی چریکاں نشانگ کرتگ ءُ شھید کرتگ اَنت۔ھمے پیم ھمساھگیں ڈیھ ایران ءِ بست ءُ بندی سیمسرانی تہ ءَ ھم داں انیگ ءَ دھانی کچ ءَ بلوچ پاکستانی چریکانی دست ءَ شھید بیتگ۔ چہ ایشاں شم سر ءَ ایرانی بست ءُ بند ءِ تہ ء بی این ایم ءِ راھشون دوستا بلوچ ءِ پجیگ ءَ دگہ بلوچانی لوگانی سر ءَ موشک ارشاں دوستا بلوچ ءِ پجیگ ءَ جنین ءُ چکانی کوش ھوار اَنت۔
جارکش ءَ گْوشتگ پاکستان ھمساھگیں ڈیھانی پجیگ ءَ سرجمیں جھان ءَ بلوچانی بگیری ءَ ھمے رنگیں میارباریں کردگار کنگ ءَ اِنت داں بلوچ زْرمبشت ءِ سروکاں بہ کش ایت ءُ آجوئی ءِ زْرمبشت ءَ ایرموش بہ کنت۔ جنگی راھبند ءُ مردمی اگبالانی چپ ءَ پاکستان ءِ اے شوندات ھچ وڑ ءَ روا دیگ نہ بہ اَنت۔ اے مردمگری ءِ بگیری ءَ پاکستانی مھترھند ءِ میار اَنت کہ ایشانی سر ءَ پاکستان میان استمانی تک ءَ جست ءُ پرس کنگ بہ بیت۔
