شال: مردمی ھکانی کارکن ءُ زور بیگواھیں راشد ھسین ءِ زوریں بیگواھی ءِ بگیری ءَ کھول ءِ نیمگ ءَ یک شمبے ءِ روچءَ زھرشانی روانکے کشگ بوتگ۔ روانک ءَ زور بیگواھیں مردمانی کھولاں ابید سیاسی ءُ چاگردی کارکن ءُ لس مردماں بازیں کچے ءَ بھر زرتگ۔
زھرشانی کنوکیں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت کہ آیاں اوگام جتگ ءُ زور بیگواھیں مردمانی آجوئی ءُ بلوچ چکچینی ءِ دارگ ءِ لوٹ کرتگ۔
زھرشانی ءَ راشد ھسین ءِ مات ءَ تران کرتگ ءُ گوشتگ کہ منی زھگ 2018 ءَ چہ مزن ھور ءَ چیریں ادارھانی کارمنداں آوار جتگ ءُ پد ءَ پاکستان ءَ دیم داتگ۔
آئی ءَ گوشتگ کہ راشد ھسین چہ مزن ھور ءَ پاکستان ءِ پرمان ءِ رد ءَ پنچ سال پیش آوار جنگ ءُ بیگواہ کنگ بوتگ کہ آئی زوریں بیگواھی ءَ متھدہ ارب امارات ءِ چیریں ادارھانی کارمندانی دست ھوار اِنت۔
کھول ءِ گوشگ اِنت کہ گوستگیں پنچ سال اِنت ما پہ اوستے ریاست ءِ آمیدگس ءُ پہ زور بیگواھیں مردماں جوڑ بوتگیں کمیشناں پیش بوگ ءَ ایں، ابید چہ انساپءَ آمارا گیش ترسینگ ءَ اَنت ءُ چہ آمیدگس ءَ کیس در کرتگ ءُ آمیدگس ءَ آئی کیس نہ چارتگ ءُ انگت ءَ ودار دیگ ءَ اِنت۔
آئی ءَ گوں مردمی ھکانی ادارہ ءُ میان استمانی راجاں لوٹ کرتگ کہ آ راشد ھسین ءِ باروا جست بہ کن اَنت ءُ پہ راشد ھسین ءِ آجوئی ءَ وتی کرد ءَ پیلو بہ کن اَنت۔
