چہ مزن ھور ءَ زور بیگواہ کنگ بوتگیں مردمی ھکانی کارکن راشد ھسین ءِ مات ءَ وتی زھگ ءِ یل نہ کنگ ءِ بگیری ءَ 18 اگست ءَ شال ءَ زھرشانی کنگ ءِ جار جتگءُ گوشتگ کہ پاکستان ءِ آمیدگس انساپ دیگ ءَ بے سوب بوتگ اَنتءُ ریاست پہ بلوچانی جیڑھانی گیش ءُ گیوار کنگ ءَ سنگین نہ اِنت۔
آئی ءَ رسانکدر ءَ وتی شنگ بوتگیں تامربندے ءَ گوں شال ءِ سیاسی ءُ چاگردی کارکناں ھوار گوں درسیں بھرگاں لوٹ کرتگ کہ آ 18 اگست ءَ پہ راشد ھسین ءِ یل نہ کنگ ءِ بگیری ءَ بیوکیں روانک ءَ بھر بزور اَنت۔
آئی ءَ گوشتگ کہ پہ انساپ ءِ لوٹ ءَ کانود ءِ درسیں در ٹک اتگ اَنت ءُ انساپ ءِ لوٹ کرتگ، چہ کراچی ءَ شال ءُ چہ شال ءَ اسلام آباد ءَ آمیدگس ءِ دروازگ ٹک اتگ مئے گون ءَ انساپ کنگ نہ بوتگ۔
