بلوچ راجی زرمبشت ( بی این ایم ) ءِ بنجاھی سرکماش ڈاکٹر نسیم ءَ وتی شنگ کرتگیں درشانے ءَ کیچ آپسر ءِ شھید امداد بجیر ءُ رزا جھانگیر ءَ آیانی شھیدی ءِ یازدھمی سالروچ ءِ درگت ءَ ستک شانی ندر کرتگ ءُ گوشتگ کہ چاردہ اگست ءِ سھب ءَ پاکستانی لشکر ءَ بی این ایم ءِ دمگی سروک، لبزانکار، زانوگر امداد بجیر ءِ گس ءَ اُرش کرتگ ءُ امداد بجیر ءُ بی ایس او آزاد ءِ کارگشاد رزا جھانگیر ءَ کشتگ۔ دوئیں سیاسی کارکن ءُ بے میار بوتگ اَنت، بلے امداد بجیر ءِ گس ھما وڑ ءَ گوں راکٹ ءِ گولایاں نشانگ کرتگ کہ انچوش کہ میڑ ءَ یک ٹولی یے بہ بیت۔ پاکستان انچیں رستری ءِ آماچیں ریاستے کہ آئی دیم ءَ کودک ءُ سلاہ بندیں جھدکار ءَ پرک نیست۔
آئی ءَ گوشتگ کہ اگست ءِ ماہ نہ تیوک ءَ بلوچ بلکیں پہ سرجمیں دمگ ءِ راجاں یک سیاھیں روچے، 14اگست ءَ چہ ھواریں ھندوستان ءَ یک باڑھی ریاستے ( پاکستان ) ءِ جوڑ کنگ ءَ برتانیہ پہ وتی نپانی پھازداری ءَ الم سوب کرتگ بلے داں مرچی ءَ بلوچ،سندھی،پشتون، کشمیری ءُ آدگہ ایردست ءُ نزوریں راج اے برتانیہ ءِ ساچشتی نھاد ءَ پیلو کنگ ءَ اَنت۔
ڈاکٹر نسیم ءَ گوشتگ کہ بلوچ سیاسی زرمبشت ءِ مھکمی ءَ سیاسی کارکنانی یک دراجیں لڑے کہ آیاں پہ سیاسی دیمروئی ءُ راجی ءُ آشوبی زانشت ءِ سر کنگ ءَ وتی جانانی دیمونی داتگ۔ آیانی تہ ءَ امداد بجیر ءُ رزا جھانگیر دو نامداریں گستائیں نام اَنت کہ آیاں مرچی گیر کار ایں۔ رزا جھانگیر ءُ امداد بجیر ءَ گرانیں سیاسی جاورانی تہ ءَ ھمے پیش داشتگ کہ پہ گل ءُ پارٹی ءِ بے دروریں کار پیلو کرتگ، مردمانی پہ سیاسی پڑا یکجاہ کنگ ءَ داں گڈی دم ءَ اوشتاتگ اَنت۔
بی این ایم ءِ سرکماش ءَ گوشتگ کہ شھید امداد بجیر یک لبزانکار، زانوگر ءُ مھکم لیکھیں سیاسی سروکے اَت آئی ءَ پہ بی این ایم ءِ دیمروئی ءَ لٹریچر ءِ ساچشت ءُ کتابانی بھر ءُ بانگ کنگ ءَ مدام جوانیں کرد پیلوکرتگ۔ بلوچ راجی زرمبشت ءِ جتائیں بھرگانی سر ءَ سدانی کچ ءَ نبشتانک نبیس اتگ۔ بی این ایم ءِ راھبند ءِ سر ءَ شھید گلام مھمد ءِ لیکہ ءِ رندگیری ءَ یک بے دروریں کردے بوتگ ءُ بلوچ راجی گوستانک ءَ نمیران بوتگ۔
ڈاکٹر نسیم ءَ گوشتگ کہ بی ایس آزادءِ کارگشاد رزا جھانگیر کم امری ءَ ابید مزنیں زانوگرے بوتگ۔ آئی ءَ ناگیگیں جاورانی تہ ءَ پہ گل ءِ دیمروئی ءُ بلوچ نودربرانی زانشتی بنیاد ءَ آجوئی جھد ءِ گون ءَ یکجاہ کنگ ءَ جتائیں بھرگانی تہ ءَ کار کرتگ ءُ ھمے مشن ءِ میان ءَ امداد بجیر ءِ گون ءَ دژمن ءَ آ کشتگ۔
