بلوچ آجوئی لشکر (بی ایل اے) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں شال،ھزدار، تربت ءُ کلات ءَ پنچ جتائیں کاروائیاں زورگریں پاکستانی لشکر ءُ پہ لٹ ءُ پلی شوربندیاں راشن بروکیں گاڑی نشانگ کرتگ اَنت ءُ وانگی ادارھاں ترّ ءُ گرد کرتگ ءُ وتگڑیں پاکستان ءِ شاتکامی مراگش بند کنائینتگ اَنت۔
جارکش ءَ گوشتگ کہ بی ایل اے ءِ سرمچاراں مرچی شال ءِ ھند بروری دگ ءَ یک وانگجاھے ءَ شتگ اَنت، اود ءَ چہ زورگریں پاکستانی لشکر ءِ پرمان ءُ زور دیگ ءِ سر ءَ وتگڑیں شاتکامی مراگشے ءِ چِن ءُ لانچ برجاہ بوتگ۔ سرمچاراں وانگجاہ ءَ ساڑی ئیں راھدربراں ھوار گوں زھگاں گند ءُ نند کرتگ ءُ زورگریں ریاست ءِ نیمگ ءَ وتگڑیں آجوئی شاتکامی مراگش ءِ برجم دارگ ءِ پندل ءُ جھان ءِ چماں بلوچستان ءِ جنگ آماچیں جاورانی بابت ءَ چمانی پچ کنگ ءِ کنگ ءِدرگت ءَ گپ ءُ تران کرتت ءُ جاور ءُ پرز ءِ بابت ءَ سرپدی داتگ۔ ھمے وانگجاہ ءِ راھدربراں گوں سرمچاراں تپاک کرتگ ءُ مراگش بند کرتگ۔
جارکش ءَ گوشتگ کہ بی ایل اے ءِ سرمچاراں مرچی شپ ءِ ادار نو ءُ پانزدہ ءُ نزیک ءَ شال ءِ ھند سریاب مِل ءَ جنکانی وانشتجاہ ءَ زورگریں پاکستانی لشکر ءِ سروکی ءَ وتگڑیں شاتکامی ءِ چِن ءُ لانچ گوں دستی بمب اُرش ءَ نشانگ کرتگ۔
جارکش ءَ گوشتگ کہ بی ایل اے ءِ سرمچاراں دوشی ھزدار ءِ ھند بازگیر ءَ زورگریں پاکستانی لشکر ءِ دو پیادگیں کارمند ھما وھد ءَ گوں دستی بمب اُرش ءَ نشانگ کرتگ اَنت کہ آ وتی بنجل ءِ نزیک تر ءُ گرد کنگ ءَ بوتگ اَنت۔ تراک ءِ آسر ءَ دوئیں کارمند ٹپی بوتگ اَنت۔
جارکش ءَ گوشتگ کہ ھمے وڑ ءَ دوشی دگہ یک کاروائی یے ءَ بی ایل اے ءِ سرمچاراں تربت ءَ بالی پٹ دگ ءَ پاکستانی لشکر ءِ پانگس گوں گرنیڈ لانچر ءَ نشانگ کرتگ کہ اُرش ءَ پاکستانی لشکر ءَ جانی ءُ مالی تاوان ءِ دیمپانی بوتگ۔
جارکش ءَ گوشتگ کہ بی ایل اے ءِ سرمچاراں مرچی کلات ءِ ھند منگوچر ءِ بدرنگ ءَ سیندک ءِ پہ لٹ ءُ پلی شوربندی ءَ سامان بروکیں ٹرالر گاڑی نشانگ کرتگ اَنت۔ سرمچاراں گاڑی ءِ درسیں ٹائر تباہ کرتگ اَنت۔ کاروائی ءِ وھد ءَ یک ڈرائیورے ٹپی بوتگ۔
بی ایل اے ءِ جارکش ءَ اُرشانی زمہ واری منّ اِتگ ءُ گوشتگ کہ زورگریں پاکستانی لشکر ءُ آئی شریدارانی سر ءَ مئے اُرش برجاہ بنت۔
