شال: بیگواھیں بلوچانی توار ( وی بی ایم پی ) ءِ نیمگ ءَ پہ زور بیگواھیں مردمانی پدجنگ ءَ شدکشیں زھرشانی گدان ءَ 5542 روچ سرجم بوتگ۔ یک شمبے ءِ روچ ءَ پی ٹی ایم ءِ کارکن شمس ھوتک ھان ءَ ھوار آدگہ مردم پہ ھمدردی درشان کنگ ءَ گدان ءَ آتک اَنت
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ پسگانی شھیدی ءُ بند ءُ زندانی زوگر ءِ ربیتانی تہ ءَ نوک نہ اِنت، اے رندی ناشری، رستری، ناھکیانی سیمسر گواز کنگ بوتگ۔ پہ بلوچ زرمبشت ءِ دارگ ءَ پاکستان ءُ آئی چیریں ادارھانی نیمگ ءَ بلوچ چکچینی برجاہ اِنت۔ رستری ءُ زوراکیانی درورے برجاہ دارگ بوتگ۔
آئی ءَ گوشتگ کہ ھمے گندگ بوگ ءَ اِنت کہ زورگریں پاکستان ءَ نہ تیوک ءَ بلوچستان ءَ بلوچ سرڈگار ءُ مڈیانی پہ لٹ ءُ پل ءَ وتی زورگپتی برجاہ داشتگ بلکیں بلوچ راج چہ وتی ھستمان ءَ ھلاس کنگ یا کَشگ ءِ واھگدار اِنت۔ گنتریں زوراکی برجاہ اَنت سیاسی کارکن نودربر، ورنا ءُ مردمی ھکانی پرکاریں کارکناں ھوار جتائیں بھرگاں سیادی داروکیں مردم آوار جنگ ءَ پد آیانی ژانگولیں جنگلاں کپگ ءَ اَنت۔
ماما کدیر گوشتگ کہ گوستگیں ماہ ءَ ھزارانی کچ ءَ بلوچ بیگواہ کنگ بوتگ اَنت ءُ اے درکانودی آوار جنگ ءِ درچ انگت ءَ برجاہ اِنت۔
آئی ءَ گوشتگ کہ پاکستانی لشکر ءُ چیریں ادارھانی چہ اے زوراکیاں بازیں جست ودی بیت۔ بازیں مردم ھیران اَنت کہ اے کجام سوب اِنت کہ پاکستان سرکار ءِ زورگپتی وتی جاہ ءَ بلوچاں گوں دردناکیں وڑے ءَ ھلاس کنگ ءِ جھد بوگ ءَ اِنت۔
