یازدہ اگست، چہ برتانیا ءِ زورگپتی ءَ بلوچستان ءِ آجوئی روچ ءِ درگت ءَ وتی درشانے ءَ بلوچ راجی زرمبشت ( بی این ایم ) ءِ جارکش ءَ گوشتگ کہ یازدہ اگست نوک کول کنگ ءِ روچ اِنت۔ بیا اِت مرچی پد ءَ بلوچستان ءِ آجوئی ءِ گرگ ءِ کول ءَ کن ایں کہ مارا بلوچ شھیدانی ھونانی سوگند اِنت کہ بلوچ راجی آجوئی جھد ءَ برجاہ دار این ءُ چوشیں ھچ پیمیں کارے نہ کن ایں کہ چہ ایشی آجوئی زرمبشت ءِ سیتاں تاوان بہ بیت۔
آئی ءَ گوشتگ کہ یازدہ اگست 1947 ءَ بلوچستان ءَ چہ برتانیا ءِ زورگپتی ءَ آجوئی جار پرینگ بوتگ۔ بلوچستان ءِ سروکاں اے روچ ءَ باندات ءِ راجمستری بلوچستان ءِ کچ ءُ کساس تچک کرتگ اَنت ءُ آجوئیں راجے ءِ بستار ءَ بلوچ راجی دیمروئی ءِ نشون پدر کرتگ۔
جارکش ءَ گوشتگ کہ اگاں برتانیا ءِ پندل ءِ رد ءَ بلوچ راج چہ آجوئی ءَ زبھر کنگ مہ بوتیں گڑا مرچی بلوچستان ءَ ھوار سرجمیں دمگ وشھال ءُ ایمن بوتگ اَت۔ برتانیا ءَ بلوچستان ءِ سر ءَ پہ زورگپتی ءَ پاکستان کمک کرتگ بلے اد ءَ پہ جھمنند ایں مردمانی بنیادی ھکانی پھریزگ ءَ ھچ وڑیں کرد پیلو نہ کرتگ۔ سرکارانی یکجاھی ادارھانی سوبی اِنت۔ برتانیا ءِ سروکی ءَ برجاھیں ادارہ وتی بنکی سیت راجمستری، ایمنی ءُ مردمی ھکانی پھریزگ ءَ سک دور اِنت۔
آئی ءَ گوشتگ کہ بنگلہ دیش ءِ آجو بوگ ءُ مرچی پاکستان ءِ ایردستیں راجانی جاوراں ھمے پدر کُرتگ کہ ھندوستان ءِ بھر ءُ بانگ بے سوب بوتگ۔
بی این ایم ءِ جارکش ءَ لوٹ کرتگ کامن ویلتھ ءِ سیتاں پاکستان ءِ باسکی ھلاس کنگ بہ بیت۔ برتانیا ھمے لوٹ ایت کہ وتی گوستانکی ردی ءِ پھلی ءَ بلوچ راجی آجوئی ءِ پلہ مرزی ءَ بہ کنت۔
آئی ءَ دیمتر ءَ گوشتگ کہ بلوچ راج پاکستان ءَ گوں آجوئی ءَ ھوار چہ درسیں ھکاں زبھر کرتگ۔ بلوچ راج ءِ سیاسی سروک ءُ راجدوستیں سیاسی کارکن پاکستان ءَ کشتگ اَنت ءُ پہ بلوچ راج ءَ ایمنیں جھد ءِ راہ بند کرتگ اَنت۔ بلوچ راجی آجوئی ءِ زرمبشت ءِ ھزارانی کچ ءَ شھیدانی ھون ھچ پیم ءَ بکشگ نہ بنت۔ شھیدانی ھونانی بیر آجوئی اِنت۔
جارکش ءَ گوشتگ کہ یازدہ اگست مارا ھمے ترانگ ءَ گیج ایت کہ راجی آجوئی ءَ ابید ما پشت نہ کپ ایں ءُ مئے چُکچینی برجاہ بیت، مئے زبان، دودمان، لبزانک ءُ راجی پجار ءَ پاکستان ءِ ریاست ھلاس کنت ءُ مارا چہ راجی پجار ءَ زبھر کنگ لوٹگ ءَ اِنت۔ راجی آجوئی زرمبشت مئے ھستی ءِ مانزمان اِنت۔
آئی ءَ گوں بلوچ آجوئی زْرمبشت ءَ ھمگرنچیں جھدکاراں ءَ دلگوش گْور کرتگ ءُ گوشتگ کہ مرچی راجی سیاسی کارکن وتی زاتی کرد ءَ بہ چار اَنت ءُ پد ءَ کول بہ کن اَنت۔ راجی آجوئی جھد ءَ مردمانی ھواری ءِ گیش کنگ ءَ داں ھمک بلوچ ءَ راجی آجوئی ءِ کلوہ ءَ سر بہ کن اَنت ءُ آیانی شریں وڑے ءَ پلہ مرزی ءَ بہ کن اَنت۔
