گریشگ: زورگریں پاکستانی لشکر ءِ دست ءَ زور بیگواہ کنگ بوتگیں مردمانی کھول ءَ گوشتگ کہ 19 جولائی ءَ سھب ءِ چار ءَ شش گاڑیانی سر ءَ وردی ءُ سادگ پوشاکیں ریاستی لشکر سی ٹی ڈی ءَ گریشگ کوچو ءَ مئے میتگ ءَ بیڑ برتگ ۔ مردمانی سر ءَ تیرگواری کرتگ، مئے ورنائیں زھگ اِش درکانودی آوار جتگ ءُ زور بیگواہ کرتگ اَنت۔ گساں لٹ ءُ پل اِش کرتگ۔
آئی ءَ گوشتگ کہ شش ورنا آوار جتگ ءُ بیگواہ کرتگ کہ آیانی تہ ءَ شاہ جان ء سلیم، گوھردین ء ھیرجان، مھم جان ء لال بکش، میار ء لال بکش، آرپ ء ا بدارھمان، منیر اھمد ء سبرو ھوار اَنت۔ منیر چہ بازیں لٹ شاپ کنگ ءَ پد دگ ءِ پھنات ءَ چگل دیگ بوتگ۔
آئی ءَ گوشتگ کہ اے ویل ءَ پد ما پولیس ءِ کر ءَ شتگ ایں مئے ارزی ءَ بہ نبیس بلے پولیس ءَ چہ اے ٹوھین میار ءِ بگیری ءَ ارزی نبیسگ ءَ تچک ءَ مکن کرتگ۔
آئی ءِ گوشگ اِنت کہ ما پہ وتی زھگانی زندگیءِ پھریزگ ءَ گریشگ ءَ سی پیک دگ بند ٹوبڑو نال ءَ بند کرتگ ءُ نشتگ ایں، ھمے میان ءَ گوں واکدار ءَ لھتے لوٹانی بنیاد ءَگپ ءُ تران ءَ پد وتی زھرشانی ھلاس کرتگ کہ مئے زھگ آجو کنگ بہ بنت، اگاں ریاست ھمے سرپد بیت کہ آیاں میارباری یے کرتگ گڑا وتی جوڑ کرتگیں آمیدگس ءَ پیش اِش بہ کنت۔ اگاں مئے زھگ کجام ادارہ ءِ کر ءَاَنت آئی نام ءَمارا بہ گوش ات ءُ مئے مردمانی جان ءِ پھازداری ءِ زمہ وار اِنت۔
آئی ءَ گوشتگ کہ واکدار ءَ گوں نبشتہ ءَ کول کرتگ کہ اگاں داں پنچ روچاں اے لوٹانی سر ءَ کاروائی نہ کرت گڑا ایشی زمہ واری واکدار، گپ ءُ ترانی ٹولی ءُ تیوک ءَ اے ڈی سی ءِ سر ءَ بنت۔ چہ ایشی پد گوھردین ء ھیرجان ءُ میار ء لال بکش آمیدگس ءَ پیش کنگ بوتگ اَنت آدگرانی باروا ھچ وڑیں ھال نیست۔
آئی ءَ گوشتگ کہ پنچ روچ ءِ جاہ ءَ نوزدہ روچ گوستگ بلے مئے مردم انگت یل کنگ نہ بوتگ اَنت ما واکدار ءَ کڈن کن ایں کہ داں چل ءُ ھشت ادارانی میان ءَ مئے آدگہ سے ئیں مردم یل کنگ نہ بوت اَنت گڑا ما راجمستری پارست ءَ ترندیں زھرشانی کن ایں۔
آئی ءَ گوشتگ کہ ما گوں وتی برات ءُ گھاراں ھمے لوٹ ءَ کن ایں کہ اے جیڑہ تیوک ءَ مئے نہ اِنت، اے زوراکی دگرے ءِ گون ءَ بوت کنت۔ اگاں ما بے توار بوت ایں مئے مات گھار مدام گریوائینگ بنت۔ مئے ورنا مدام اچما پلگ ءُ تھاریں کوٹیاں بیگواہ کنگ بنت۔ اگاں ما گوں یکجاھی ءُ ھم پتیءَ توار چست بہ کن ایں گڑا الم انساپ گرگ ءَ سوبین بہ ایں۔
