کیچ: چہ تربت ءَ شھید پدا اھمد چاراہ ءِ برجاھیں بلوچ راجی مچی ءَ بیگواھیں بلوچانی توار ( وی ی ایم پی ) ءِ کارگشاد ءُ زور بیگواھیں ڈاکٹر دین مھمد ءِ جنک سمی دین ءَتران کرتگ ءُ گوشتگ کہ گوادر ءَ پہ یک روچے ءِ مچی دارگ ءِ نیلگ ءَ لٹ شاپ کنگ ءَ بلوچ یکجاہ بوتگ اَنت ءُآیاں داں سیزدہ روچاں جتا جتائیں ھنداں راجی مچی برجم داشتگ اَنت۔ بلوچاں چہ وتی راجی زور ءَ ھمے پیش داشتگ کہ آیاں نوں کس ایردست کرت نہ کنت ءُ نہ اے ایردستی گیشتر دراجکش بوت کنت۔
آئی ءَ گوشتگ کہ اے مئے وتن اِنت ایشی پھازداری ءُ اے مڈیانی پھریزگ مئے درسانی زمہ واری اِنت۔ پہ اے زمہ واری ءِ پیلو کنگ ءَ مارا درساں گوں راجی زرمبشت ءَ ھوار ءُ یکجاہ بوگی اِنت دانکہ ما وتی راجی پدریچ ءَ بہ پھریز ایں۔
سمی دین ءَ گوشتگ کہ گوادر ءَ راجی مچی ءِ بگیری ءَ ریاست ءَ مزنیں کچے ءَ بیڑ برتگ ءُ زوراکی کرتگ اے راجی گوستانک ءِ تہ ءَ پہ مدامی یات کنگ بیت۔ پہ راجی مچی ءِ دارگ ءَ ریاست ءَ بلوچانی کاروان راہ ءَ داشتگ اَنت ءُ مردم لٹ شاپ کرتگ اَنت ءُ زوراکی کرتگ، ھمے میان ءَ مئے باز ورنا شھید بوتگ اَنت ءُ درزنانی کچ ءَ مردم ٹپی بوتگ اَنت کہ آ انگت ءَ مرگ ءُ زند ءِ میان ءَ ساہ کشگ ءَ اَنت۔
آئی ءَ گوشتگ کہ ما وتی مردمان ءَ پاد کرتگ ءُ آیانی سوبمندی ءِ نھاد ءَ سبر ءُ اوپار ءِ سکیں داتگ اے مئے سوبمندی اِنت ءُ اے سوبمندی ءَ جھان ءِ ھچ وڑیں زورے پروش دات نہ کنت۔ بلوچانی یکجاھی ءَ مارا ھمتءُ توکل بکش اِتگ، چہ اے توکل ءَ ھمے پدر بیت کہ زورگر ءَ پروش وارتگ۔
