بلوچ یکجھتی کمیٹی ءَ ماں رساانکدرءَ وتی شنگ کرتگیں درشانے ءَ گوشتگ کہ گواددر ءَ بلوچ راجی مچی ءِ سر ءَ ریاستی زوراکیانی بگیری ءَ بنجاھی نندانک اے وھد ءَ گوادر ءَ برجاہ اِنت۔ گوادر ءِ نندانک ءَ دہ روچ سرجم بوتگ ءُ مرچی نندانک ءَ لس مردمی دیوانے برجم دارگ بوتگ، ایشی تہ ءَ بلوچ یکجھتی کمیٹی ءِ سروک ءُ مردمانی میان ءَ انوگیں جاوراں ھوارجتائیں بنگپانی سر ءَ گپ ءُ تران کنگ بوتگ۔ بلوچ راجی مچی ءِ زھرشانی کنوکانی میان ءَ ھمے گپ ءِ سر ءَ تپاک کنگ بوتگ کہ بلوچ چکچینی ءِ اے جھد ءَ تیز کنگ درکار اِنت ءُ اے جھد نوں بلوچستان ءِ گس گس ءَ سر کنگ لوٹ ایت۔ بلوچ راجی مچی ءِ زھرشانی کنوک درسیں ریاستی زوراکیاں ابید توکل اِش مھکم اِنت۔
آئی ءَ گوشتگ کہ ریاست ءَ گوستگیں دہ روچ اِنت گوادر ءَ ھوار سرجمیں مکران ءَ مھشر جوڑ کرتگ، داں انوں گوادر ءَ ھوار مکران ءِ گیشتریں ھنداں دامگ ءُ نیٹ ورک بند اَنت، مکران ءِ گیشتریں شھدگ بند اَنت۔ چہ ایشی سوب ءَ ورگ ءُ درمان ءِ نیستی اِنت۔ چہ ایشی ابید گوادر آپ ءِ لین بند کنگ بوتگ اَنت۔
آئی ءَ گوشتگ کہ بلوچ راجی مچی ءِ سر ءَ ریاستی زوراکیانی بگیری ءَ گوادر ءَ ابید شال، نوشکے، پنجگور ءُ تربت ءَ ھم نندانک برجاہ اَنت۔
