گوادر: بلوچ راجی مچی نندانک جاہ ءَ بلوچ یکجھتی کمیٹی ءِ نیمگ ءَ برجم داشتگیں دیوان ءَ بلوچ یکجھتی کمیٹی ءِ سروک داکٹر ماہ رنگ ءَ تران کرتگءُ گوشتگ کہ شھید ھمدان بلوچ آ ورنایے اَت دو روچ بیت نوشکے ءِ سرڈگار ءِ سر ءَ جنگ بوتگ۔ھمے وڑ ءَ مئے برات شھید نسیر بلوچ تلار ءَ لکاں آبادی ءِ میان ءَ پہ 28 جولائی ءِ راجی مچی ءِ بھر زورگ ءَ چہ پاکستانی لشکر ءِ تیرگواری ءَشھید کنگ بوتگ۔ شھید ازگر بلوچ ھمے جاہ ءَ کہ ما اد ءَ نشتگیں پاکستانی لشکر ءِ چہ زوراکیں کارمندانی تیرگواری ءَ شھید بوتگ۔
آئی گوشتگ کہ مئے شھیدانی لاش ھم کمشرپ کنگ بنت۔ شھید نسیر ءِ لاش ھمے نادراھجاہ ءَ کپتگ ھمے ریاست ءِ لشکری ءُ دلاراں نادراھجاہ بند کرتگ کہ آئی برات، ما ءُ شما آئی لاش ءَ چست کرتگ مہ کن ایں۔ پہ اے سر ڈگار ءَ مئے چنچو ورنایاں وتی ھون ریتگ اَنت۔
ڈاکٹر ماہ رنگ ءَ گوشتگ کہ اے راجی مچی ءِ کاروان ءُ نندانک ،انچانیں نندانکے نہ اِنت، پہ نندانک ء ِ برجاہ دارگ ءَ مئے شھیداں وتی ھون داتگ اَنت۔ اے جھد کہ اے جاہ ءَ آتکگ ءُ سر بوتگ چہ مئے شھیدانی ھونانی سوب ءَ سر بوتگ۔ پہ اے کاران ءِ سر بوگ ءَ مئے زھگ، مات، گھار، برات، کماش درساں دیمونی داتگ۔ بلوچ راجی زرمبشت ءُ بلوچ سرڈگار ءِ واھند بلوچ راج اِنت دگہ کسے نہ اِنت۔
آئی ءَ گوشتگ کہ اے گھگیری ءِ تہ ءَ ما وتی گھاراں گند ایں کہ آگوں وتی کسانیں دو سی ماھی زھگاں اد ءَ آتکگ اَنت۔ مرچی ریاست ءِ یک مزنیں پندلے ساز اتگ ، آ پندل ایش اِنت کہ مارا بھر ءُ بانگ کنگ ءَ اَنت۔ ما گوادری، جھلاوانی ءُ سروانی نہ ایں ما بس بلوچ ایں۔ ھما مردم کہ بلوچ ءَ بھر ءُ ناگ کنگ لوٹ ایت آ بلوچ ءِ دوست نہ اِنت دژمن اِنت۔
ڈاکٹر ماہ رنگ ءَ گوشتگ ما ءُ شما بہ زان ایں بلوچ ءِ جیڑہ روزگار نہ اِنت، بلوچ ءِ سرڈگار دستیگ اِنت۔ دانکہ اے سڑگار ءِ وتواکی ءِ نیمگ ءَ مہ روت ما کدی ھم دیمروئی کرتگ نہ کن ایں۔ مئے جاور گنتر بوت کن اَنت بلے شر بوت نہ کن اَنت۔
آئی ءَ گوشتگ کہ ھمے گونڈو مرچی مئے دیوان ءَ نشتگ اَنت مارا آیانی باروا جیڑگ لوٹ ایت کہ ما آیاں چونیں زندے دات کن ایں۔
ڈاکٹر ماہ رنگ ءَ پہ اے نیلیں زر ءُ سرڈگار ءَ مئے انچیں ورنایاں وتی سر کربان کرتگ اَنت کہ آ پہ چارگ ءَ شات نہ بنت۔ بلے آیاں وت ءَ پہ اے زمین ءَ ٹکٹر ٹکر کرتگ پہ آیانی ٹکٹراں مارا جست گرگی اِنت۔
