شال: بیگواھیں بلوچانی توار ( وی بی ایم پی ) ءِ نیمگ ءَ پہ زور بیگواھیں مردمانی پد جنگ ءَ شدکشیں زھرشانی گدان ءَ 5535 روچ سرجم بوتگ۔
دوشمبے ءِ روچ ءَ چہ کلات ءَ سیاسی ءُ چاگردی کارکن نور اھمد، زھر بلوچ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماماکدیر گوں مردماں تران کرتگ ءُ گوشتگ کہ جولائی ءِ ماہ ءَ چو آدگہ ماھانی وڑ ءَ ریاستی زوراکی لشکرکشی، ژانگولیں لاشانی دزکپتگ ءَ زورگریں ریاست ءَ وتی ربیت برجاہ داشتگ اَنت۔ بلوچ راج ءِ سر ءَ پاکستان ریاست ءِ پہ زورگپی ءُ ایردستی ءِ گیش کنگ ءَ ترندی گندگ بوتگ۔ ریاستی زوراکی بلوچستان ءِ جتائیں ھنداں بندات بوتگ اَنت ءُ مردم شھید کنگ بوتگ اَنت۔ اود ءَ چیریں ادارھانی کارمند سرجمیں بلوچستان ءَ مردمانی نشانگ کنگ ءَ پد آدگہ بنشونانی رد ءَ ریاستی زوراکی اِش برجاہ داشتگ اَنت۔
ماما کدیر گوشتگ کہ پاکستان یک ناشرکاریں ڈیھے اے پہ سرجمیں جھان ءِ مردمگری ءَ ترسناک انت۔ اگاں نوں ایشی دیم دارگ نہ بوت گڑا جھان ءَ جنجال کنت۔ اے آشوب ءِ زمانگ ءَ زورگریں ریاست ءُ آئی راجدروھیں کارمندانی نیمگ ءَ بلوچ ءِ ھچ کس پھریز نہ اِنت۔
ماما کدیر گوشتگ کہ پاکستان ءِ آمیدگس ریاستی ادارھانی ھواری ءَ بلوچ راج ءِ چکچینی ءِ سر ءَ میان استمانی ءُ تھی مردمانی چمانی بند کنگ ءِ لیب ءَ اِنت۔ چیپ جسٹس ءِ گوشگ اِنت کہ پہ بیگواھیں مردمانی آجوئی ءِ باروا ھچ وڑیں کار بوگ ءَ نہ اِنت۔
