بلوچ راجی زرمبشت ( بی این ایم ) زرباری کوریا چیپٹر ءَ گوادر ءُ بلوچستان ءِ آدگہ ھنداں آزاردھیں کاروائیانی دیم پہ دیمی کنوکیں پہ بلوچ زھرشانی کنوکانی گون ءَ ھمدردی کنگءَ سٹی اسپاٹ نمپوڈونگ ءَ زھرشانی کرتگ۔ زھرشانی کنوکیں مردماں بینر ءُ پلے کارڈ گوں بوتگ کہ آیانی سر ءَ بلوچ چکچینی ءُ بلوچستان ءَ مردمی ھک ءُ آدگہ بگیریانی بگیر ءَ زھرشانی کنوکیں مردمانی پلہ مرزی پیش داشتگ۔
زھرشانی کنوکیں مردماں ریاستی لشکر ءِ زوراکیانی بگیری ءِ اوگام جتگ، بلوچ راجی مچی ءُ دراجکشیں بلوچ راج ءِ سر ءَ زوراکی ایر جتگ اَنت۔ زھرشانی کنگ ءِ مول گوادر ءِ نازرکیں جاورانی نیمگ ءَ دلگوش دیگ بوتگ کہ اود ءَ زھرشانی نندانک ترسناکیں جاورانی تہ ءَ برجاہ اِنت۔ ریاستی لشکر زھرشانی کنوکیں مردماں بیھار دیگ ءَ اِنت۔
روانک ءِ میان ءَ بی این ایم ءِ باسکاں بلوچستان ءِ جاورانی باروا پہ دلگوش دیگ ءَ کورین ءُ انگریزی زبان ءَ گوشتانک داتگ۔
بی این ایم ءِ باسک ھپسہ ءَ ھمے گپ کرتگ ءُ گوشتگ کہ اود ءَ جھان ءِ دلگوش گوں پلستین ءُ یوکرین ءِ جیڑہ ءِ سر ءَ اِنت اود ءَ بلوچستان ءِ جاور ترسناک اَنت مان آرگ بوگ ءَ نہ اِنت۔
آئیءَ دو دھکانی میان ءَ پاکستانی لشکر ءِ نیمگ ءَ مردمی ھکانی گنتریں بگیریانی درور داتگ ءُ ترسناکیں جاورانی سر ءَ زور داتگ۔ 28 جولائی ءَ گوادر ءَ بلوچ یکجتی کمیٹی ءِ چیردستی ءَ بیوکیں یک ایمنیں مچی یے پاکستانی لشکر ءِ نیمگ ءَ گوں آزاردھیں کاروائیاں دیم پہ دیمی کنگ بوتگ، ایشی آسر ءَ ایمنی زھرشانی کنوک باز مردم بیران ءُ ٹپی بوتگ۔ چہ اے ویل ءَ پد سرجمیں بلوچستان ءَ آزاردھی ءُ زوراکی ترند کنگ بوتگ اَنت۔ ریاستی لشکر ءَ بلوچ یکجھتی کمیٹی ءِ سروکاں ھوار سدانی کچ ءَ زھرشانی کنوکیں مردم دزگیر کرتگ اَنت۔
ھپسہ ءَ نوشکے ءَ ریاستی آزاردھیں کاروایانی گپ کرتگ، اود ءَ ریاستی لشکر ءَ ایمنیں زھرشانی کنوکانی سر ءَ تیرگواری کرتگ، چہ ایشی ءَ باز مردم ٹپی بوتگ اَنت ءُ بلوچ یکجھتی کمیٹی ءَ باسک ھمدان شھید بوتگ، اے وڑیں ویل کراچی ءَ دیم ءَ آتکگ اود ءَ ریاستی لشکر ءَ جنیناں ھوار ایمنیں زھرشانی کنوکانی بگیری ءَ زور کارمرز کرتگ، آ گران کرتگ اَنت، لٹ شاپ ءُ درکانودی دزگیر کرتگ اَنت۔
ھپسہ ءَ گوشتگ کہ اے رستری کارپد بلوچ راج ءِ بابت ءَ پاکستان ءِ میارباریاں پدرکنت۔ ما بلوچ ایمنیں دوستیں مردم ایں، گوں شرپ ءَ زند گوازینگ لوٹ ایں۔ بلے پاکستان مارا موکل دیگ ءَ نہ اِنت۔ پاکستان مردمگری ءِ بگیری ءَ میاربار، مئے مردمانی کوش ءُ آوار جنی ءُ مئے مڈیانی لٹ ءُ پل کنگ ءِ میار بار اِنت۔
بی این ایم زرباری کوریا چیپٹر ءَ گوں میان استمانی سروک ءُ مردمی ھکانی گلاں لوٹ کرتگ کہ آ دزمانجی بہ کن اَنت ءُ دراجکشیں بلوچ چکچینی ءِ ھلاس کنگ ءَ مئے کمک ءَ بہ کن اَنت۔
آیاں میان استمان تک زور داتگ کہ آ پاکستانی لشکر ءَ بگیری ءَ کاروائی بہ کن اَنت ءُ بلوچا نی پہ ایمن ءُ ھستمانی جھد ءِ پلہ مرزی ءَ بہ کن اَنت۔
