گْوادر: چہ بلوچ راجی مچی ءِ زھرشانی نندانک ءَ پنچمی روچ ءَ بلوچ یکجھتی کمیٹی ءِ سروک ڈاکٹر ماہ رنگ ءَ تران کرتگ ءُ گوشتگ کہ 28 جولائی ءَ ریاست ءَ پہ بلوچ راجی مچی ءِ دارگ ءَ وتی سرجمیں زور کارمرز کرتگ۔ مردمانی شھید ءُ ٹپی کنگ، دزگیری، لٹ شاپ، چمی گیس جنگ سرجمیں بلوچستان ءِ شھدگانی بند کنگ، دامگ ءُ نیٹورک ءِ بند کنگ ءَ ابید ھزارانی کچ ءَ مردم راجی مچی ءَ آتکگ اَنت ءُ مرچی پنچمی روچ ءَ مردم انگت ءَ زھرشانی نندانک ءَ ساڑی اَنت۔ اے ریاست بلوچانی تب ءُ ربیت ءِ باروا ھچ سرپد نہ اِنت کہ بلوچانی زور ءِ دیم ءَ سرجھل کنگ ربیت ءِ تہ ءَ مان نیست۔ اے ریاست ءَ 28 جولائی ءَ تیوک ءَ روکپتی بلوچستان ءِ بلوچانی چہ یکجاھی ءَ دارگ ءَجھد کرتگ۔ بلے راجی مچی ءِ توار روکپتی بلوچستان ءَ جسکگ ءَ اِنت، روکپتی بلوچستان ءِ بلوچ ھم گوں ھمے راجی مچی ءِ اے جھد ءَ اوشتاتگ اَنت۔ اے راجی مچی ءِ سوبمندی اِنت۔
آئی ءَ گوشتگ کہ من اد ءَ یک گچینیں بنگپے درسانی دیم ءَ تچک کن آں کہ ھما مردم گوش اَنت کہ بلوچ راجی مچی ءِ شھید بوتگیں پسگانی ھونانی نھاد گرگ بہ بیت، من آیان ءَ گوں تچکیں لبزاں گوش آں کہ مئے شھیدانی ھون انچو ارزان نہ اَنت کہ ما وتی شھیدانی ھون ءِ نھاد ءَ بگر ایں، نہ ما وتی شھیدانی ھونانی نھاد ءَ زوریں ءُ بلوچ راجی شھیدانی کمشرپی ءَ کن ایں۔ مئے راجی شھیدانی ھون ءِ نھاد ھمے گھگیری ءُ مئے راجی منزل اِنت۔ ما نہ بلوچ راجی مچی ءِ شھیدانی ھون ءِ زوریں ءُ نہ کسے ءَ اے وڑ کنگ ءِ موکل ءَ دے ایں۔ مئے شھیدانی ھونانی نھاد پنچ ءُ دہ لک کلدار نہ اِنت بلکیں یکشلیں جھد، گھگیری جھد، راجی ھم پتی ءُ راجی منزل اِنت۔
ڈاکٹر ماہ رنگ ءَ گوشتگ کہ چہ ایشی ءَ ابید بلوچ راجی کاروان ءَ ٹپی بوتگیں ھمبلانی پہ درمان کنگ ءَ چہ ریاست ءَ نھاد ءِ لوٹ ءَ نہ کن ایں بلکیں پہ ایشی ما وتی کمک ءَ وت درسیں ٹپی بوتگیں ھمبلاں درمان کن ایں۔ بلے پہ ایشی مارا گس گس ءَ چندہ کنگ بہ لوٹ ایت ما کن ایں، بلے چہ اے ریاست ءَ ھچ وڑ ءَ نھاد نہ لوٹ ایں ءُ ھمے پیش دار ایں کہ بلوچ یک زندگ ءُ نہ ترسیں راجے۔
آئی ءَ گوشتگ کہ بلوچانی اے جھد یک اوپار کنوک ءُ دراجکشیں جھدے، پہ ایشی یکشلیں جھد درکار اِنت ءُ ایشی سوبمندی گوں مھکمیں توکل ءُ دیمونی چکاریں جوزگ ءَ گوں بندوک اِنت۔ ما دلجمیں کہ ما ھمک گام ءَ اے ریاست ءِ دیم پہ دیمی کن ایں ءُ اے جھد ءَ دیم ءَ بر ایں ءُ سوبندی مئیگ اِنت۔
