نیدرلینڈ:بلوچ راجی زْرمبشت( بی این ایم) ءِ جارکش ءَ وتی درشانے ءَ گْوشتگ کہ گَل ءِ نیمگ ءَ جھانی آمیدگس( انٹرنیشنل کورٹ آپ جسٹس ) ءِ دیم ءَ گوادر ءُ بلوچستان ءِ جتائیں شھراں راجی مچی ءِ سر ءَ پاکستانی ریاست ءِ نیمگ ءَ مردمی ھکانی بگیری، ایمن ءُ بےمیاریں مردمانی بگیری ءَ زوراکی ءِ کارمرد کنگ، مردمانی دزگیر کنگ، زوربیگواھی، بازیں کچے ءَ مردمانی گاڑیاں ھوار دگہ مڈیانی آدرہ کنگ ءِ بگیری ءَ زھرشانی کنگ بیتگ۔زھرشانی ءَ گل ءِ باسکاں بینر ءُ پلے کارڈ دستاں بیتگ کہ آیانی سر ءَ بلوچستان ءَ بلوچ چکچینی ءُ زوربیگواھیں مردمانی اکس ءُ آیانی باروا نبشتہ کنگ بیتگ۔
جارکش ءَ گْوشتگ کہ زھرشانی گْوستگیں روچاں گوادر ، مستونگ ءُ بلوچستان ءِ آدگہ شھراں بلوچ راجی مچی ءِ سر ءَ تیرگْواری ءُ زوراکیانی بگیری ءَ جھان ءِ دیم ءَ گل ءِ زھرشانیانی دْرچ اِنت، اے زھرشانیانی مول ءُ مراد میان استمان ءِ دلگوش بلوچستان ءَ مردمی ھکانی بگیری ءُ بلوچ چکچینی، مردمانی سر ءَ زوراکی ءِ نیمگ ءَ کنگ بیتگ۔
آئی ءَ گْوشتگ کہ زھرشانی کنوکاں جھانی آمیدگس ءِ دیم ءَ تچکی ءَ گْوشتگ کہ پاکستان ءَ وتی جنگی میارانی چیر دیگ ءَ بلوچستان ءِ جتائیں دمگاں دامگ بند کُرتگ داں کہ لشکر وتی زوراکیاں برجاہ بہ دار ایت ءُ رسانکدر ھم گِر ءُ دار کنگ بہ بیت۔
آئی ءَ گْوشتگ کہ نیدرلینڈ ءَ جھانی آمیدگس ءِ دیم ءَ برجم داشتگیں زھرشانی ءَ شاری،مھرہ جلیل، جمال، باسد زھیر ،زھرہ ،ڈاکٹر ابدُلتیپ، ابدُلواھد ءُ نبیل تران کُرتگ ءُ گْوشتگ کہ بلوچستان ءَ چہ دھکاں برجاھیں چکچینی،لُٹ ءُ پُل ءُ زوراکیاں مردم ناگیگیں جاورانی دیمپان اَنت۔اگاں میان استمان ءُ میان استمان ءِ مردمی ھکانی ادارھاں بلوچ ءِ جیڑھانی گِر ءُ دار کنگ ءَ گامگیج نہ زُرت گڑا بلوچستان ءَ جاور گیش ناگیگ بنت ءُ پاکستان اے بےتواری ءِ پُژدر ءَ گیش لشکری زوراکی کنت۔
زھرشانی ءَ مردماں گْوشتگ کہ گْوستگیں روچاں بلوچ راجی مچی پہ ایمنی وتی ھکاں توار چست کنگ ءَ بیتگ بلے پاکستانی لشکر ءَ آیانی سر ءَ تیرگْواری کُرتگ کہ تیرگْواری ءِ آسر ءَ باز مردم شھید ءُ ٹپی بیتگ۔
مردماں چہ میان استمان ءَ لوٹ کُرتگ کہ آ بلوچستان ءَ مردمی ھکانی پادمال کنگ ءِ نیمگ ءَ دلگوش گْور بہ کنت ءُ بلوچ راجی جیڑہ ءِ گیش ءُ گیوار کنگ ءَ وتی کِرد ءَ پیلو بہ کنت۔
