گوادر: بلوچ یکجھتی کمیٹی ءِ سروک ڈاکٹر ماہ رنگ ءَ وتی شنگ کرتگیں درشانے ءَ گوشتگ کہ گوستگیں چار روچ بیت کہ گوادر انگر اِنت، 28 جولائی ءَ بلوچ یکجھتی کمیٹی ءِ نیمگ ءَ راجی مچی برجم دارگی بوتگ۔راجی مچی ءِ مول بلوچ چکچینی ءُ مردمی ھکانی لگتمالی ءِ بگیری ءَ زھرشانی ءِ یاداشتگ کنگ بوتگ۔ راجی مچی ءَ سرجمیں بلوچستان ءِ مردم پہ وتی زھرشانی ءِ یاداشت کنگ ءَ آھگ ءَ بوتگ اَنت۔ ریاست ءَ چہ آیانی آھگ ءِ کمک کنگ ءَ ابید پہ مچی ءَ بھر زوروکیں مردمانی دارگ ءَ زور کارمرز کرتگ۔
آئی گوشتگ کہ لشکر ءَ شھدگانی سر ءَ وتی پھازداری ترند کرتگ اَنت ءُ پہ زور کارمرز کنگ ءَ بازیں مردم بیران ءُ ٹپی بوتگ، پنچ سد ءَ گیش مردم دزگیر کرتگ اَنت۔ داں انوں ما نہ زان ایں کہ چنچو مردم بندیگ اِنت ءُ چنچو ٹپی اِنت۔ ایشانی تہ ءَ مزنیں کچے جنینانی ھوار اِنت۔ چہ گوادر ءَ ابید بلوچستان ءِ جتائیں جاھاں مردم زھرشانی ءَ نشتگ اَنت، آیانی بگیری ءَسرکار زور کارمرز کنگ ءَ اِنت ءُ اود ءَ ھم مردمانی دزگیری ءُ آزاردھی ءِ ھال اِنت۔
ڈاکٹر ماہ رنگ گوشتگ کہ بلوچستان ءَ مردمی ھکانی جیڑہ ودی بوتگ۔ ریاست، سرکار ءُ آدگہ ادارہ ھواری ءَبلوچانی بگیری ءَ ارش کنگ ءِ کمکار اَنت۔ بلوچ ءَ ھچ وڑیں ھک دیگ ءَ نہ اَنت کہ آ وتی ایمنیں زھرشانی ءَ ھم یاداشت بہ کن اَنت۔ چہ آئی درسیں ھک پلگ بوتگ اَنت۔
بی وائی سی ءِ سروک ءَ گوشتگ کہ ما گوں میان استمان ءَ لوٹ کن ایں کہ بلوچستان ءَ زوراکیانی بگیری ءَ توار چست بہ کنتءُ رسانکدر ءِ رد ءَ مئے گون ءَ کمک بہ کنت۔
ڈاکٹر ماہ رنگ ءَ گوشتگ کہ میان استمانی مردمی ھکانی ادارھانی گون ءَ لوٹ کن ایں کہ آ زوت دزمانجنی بہ کن اَنت دانکہ بے میاریں مردمانی جان ءِ تاوان کم بہ بیت۔ ما وتی نندانک ءَ برجاہ دار ایں ءُ پہ بلوچ چکچینی ءِ بگیری ءَ مئے جھد برجاہ بیت۔ مئے نندانک داں ھما وھد ءَ برجاہ بنت دانکہ مئے بندیگیں ھمبل یل کنگ نہ بوتگ اَنت۔ ریاست چنچو بر ءَ مئے پاد کنگ ءِ جھد ءَ بہ کنت ما واتر کائیں۔
ڈاکٹر ماہ رنگ ءَ گوں سرجمیں بلوچستان ءَ لوٹ کرتگءُ گوشتگ کہ سرجمیں بلوچستان ءَ وتی زھرشانیاں برجاہ بدار اِنت۔
