بلوچ یکجھتی کمیٹی ءِ سروک ڈاکٹر سبیہ ءَ چہ گوادر نندا نک ءَ پریس کانپریس کرتگ ءُ گوشتگ کہ مرچی گوادر ءَ بند آرگ اِنت مردمانی زندمان جنجال اَنت۔ شھر چاریں نیمگاں لشکر ءَ انگر کرتگ، دامگ ، رھوتی نزام، لین بند اَنت۔ شھر ءِ دمک دمکانی تہ ءَ سادگ پوشاکیں کارمند تر ءُ گرد کنگ ءَاَنت۔
آئی ءَ گوشتگ کہ پدی زر ءَ بلوچ راجی مچی برجاہ اِنت، پہ مچی ءِ دارگ ءَ بازیں مردم بیران ءُ ٹپی بوتگ اَنت، سدانی کچ ءَ مردم دزگیر ءُ چیریں آزار جاھاں بندیگ اَنت۔ گوادر نندانک انگر اِنت ءُانچوش گمان کنگ بیت کہ کجام وھد ءَ ایمنیں زھرشانی ءِ سر ءَ دوبر ارش کنگ بہ بیت۔
ڈاکٹر سبیہ ءَ گوشتگ کہ شھر ءَ ترس ءِ چاگردی ودی بوتگ، مردم بے کمک ءَ نادراھجاہ ءَ کپتگ اَنت، مئے کارکن کجام گس ءَ بوتگ اَنت لشکر ءَ پرشت ءُ پروش کرتگ۔ ما چو زانت نہ کن ایں کہ کئے پشت کپتگ ءُکئے چون اِنت، چنچو مردم آوار جنگ بوتگ۔
آئی ءَ گوشتگ کہ اے نندا نک چہ ریاست ءِگنتریں زوراکیاں پد ھم انگت ءَ برجاہ اِنت ءُ ایشی برجاہ دارگ ءِ جھد ءَ کن ایں۔ ھما مردم کہ گوادر ءَآتک کن اَنت گڑا بیا اَنت۔ ھما مردم کہ راھاں دارگ بوتگ اَنت آ ھمودءَ زھرشانی ءَ بہ نند اَنت۔
ڈاکٹر سبیہ ءَ گوشتگ کہ اے میان ءَ مئے درسانی زندگی ترس ءِ تہءَ اِنت۔ پاکستانی لشکر ءَ ابید چیریں ادارھانی کارمند گوں توپکاں تر ءُ گرد کنگ ءَ اَنت۔
آئی ءَ گوشتگ پارلیمنٹ ءَ ھواریں بلوچ مرچی دزکش بہ بنت اگاں نہ بلوچ آیاں زیا لانگو ءُ مینامجید ءِلڑا ھوار کنت۔ من بباں یا مباں بلے نندانک ءَ برجاہ بدار اِنت ءُ وتی لڑا ںمھکم بہ کن اِنت۔
