وائس پار مسنگ پرسنز آپ سند ءِ سروک سورٹ لوھار ءَ ھیدر آباد سی ٹی دی ءِ گوستگیں شپ ءَ کوٹری ءِ دروگیں میڑ ءُ ھیدرآباد پریس کانپریس ءَ دزگیریانی ٹاپار رد کرتگ اَنت ءُ گوشتگ کہ سی ٹی ڈی ءِ کوٹری ءَ میڑ ءُ ھیدر آباد ءَ پریس کانپریس دروگ اَنت۔
سورٹ لوھار ءِ رد ءَ دروگیں میڑ ءَ پدر کرتگیں دوئیں راجدوستیں کارکن شوکت ملوکانی ءُ نئیم ملوکانی یک سالے پیش بیگواہ کنگ بوتگ اَنت۔ آیانی گوستگیں شپ ءَ کوٹری چاول گدام ءِ نزیک ءَ یک دروگیں میڑے ءَ دزگیری پدر کرتگ اَنت۔
آئی گوشگ اِنت کہ سی ٹی ڈیءِدگہ یک مردمے ساجن ملوکانی تچگ ءِ ٹاپار دروگ اِنت کہ 28 اگست 2023 ءَ پاکستانی چیریں ادارھانی دست ءَ چہ ھیر آباد ءَزور بیگواہ کنگ بوتگ، مارا ھمے ترس اِنت کہ ساجن ملوکانی ءَچونیں دروگیں میڑے ءَ جانی تاوان مہ دنت۔ ساجن ملوکانی ءَ ھوار چونیں ھم زور بیگواھیں مردمے ءَ جانی تاوان بوت گڑا سرجمیں سند ءَ زھرشانی کن ایں۔
سورٹ لوھار ءَ گوشتگ کہ پاکستان ریاست ءِ چیریں ادارہ ءُ سی ٹی ڈی سند ءِ سیاسی ءُ راجدوستیں کارکنانی بگیری ءَ اے لشکرکشی ءُ مردمی ھکانی لگتمالیءِ سر ءَ ما گوں اکوام متھدہ، ایمنسٹی انٹر نیشنل، ایشین ھیومن رائیٹیس کمیشن، ایچ ار سی پی ءَ ھوار درسیں مردمی ھکانی ادارھانی گون ءَ دلگوش کنگ ءِ لوٹ ءَ کن ایں۔
آئی ءَ دیمتر ءَ گوشتگ کہ ما ھیدر آباد سی ٹی ڈی ءَ ھوار پاکستان ءِ درسیں چیریں ادارھاں کڈن کن ایں کہ آ زوربیگواھیں سندی راجدوستیں کارکنانی دروگیں میڑاں دزگیری ءِ پدر کنگ ءُ تاوان دیگ ءَ بند بہ کن اَنت۔
سورٹ لوھار ءَ وتی درشان ءِ گڈی ءَ گوشتگ کہ ما ھیدر آباد سی ٹی ڈی ءِ مرچیگیں پریس کانپریس ءَ سرجم ءَرد کن ایں ءُ ھمے لوٹ ءَ کن ایں کہ یک سالے ءَ پیش زور بیگواھیں سند زانشتجاہ ءِ نودربر ساجن ملوکانی ءَ زوت یل بہ کنت ، اگاں نہ سرجمیں سند ءَزھرشانی کنگ ءِ جار ءَ جن ایں۔
