بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ کہ اے میانءَ سرجمیں گوادر پاکستان ریاست ءِ گنتریں ناشری ءُ رستری ءِ آماچ اِنت۔ مرچی سھب ءَ پد ءَ پاکستانی لشکر ءَ گودر ءَ بلوچ راجی مچی ءِ ایمنیں نندانک ءِ سر ءَ ارش کرتگ، چاریں نیمگاں نندانک انگر کرتگ ایمنیں زھرشانی کنوکانی سر ءَ تیرگواری بندات کرتگ، ایشی آسر ءَ داں انوں باز مردم ٹپی بوتگ، آیانی تہ ءَ جنین ءُ زھگ ھوار اَنت۔ ٹپی بوتگیں مرم اے وھد ءَ پاکستانی لشکر ءِ انگر ءَ اَنت۔ نہ آیاں نادراھجاہ ءَ روگ ءِ موکل دیگ بوگ ءَ اِنت ءُ نہ ایمبولینس دیگ بوگ ءَ اِنت۔
آئی ءَ گوشتگ کہ مارا ترس اِنت ٹپی بوتگیں مردماں زوت درمان ءِ کمک مہ بیت بازیں مردمانی جان تاوان بنت۔ چہ زھرشانی نندانک ءُ گوادر ءَ شھر ءَ سدانی کچ ءَ مردم زور بیگواہ کنگ بوتگ اَنت۔ بازیں کچے ءَ گساں بیڑ برتگ ءُ پرشت ءُ پروش کرتگ۔ اے وھد ءَ پاکستان ریاست ءَ گوادر مھشر جوڑ کرتگ، ھزارانی کچ ءَ مردمانی زندمان ترس ءِ تہ ءَ اِنت۔
آئی ءَ گوشتگ کہ بلوچ یکجھتی کمیٹی بلوچاں ھوار درسیں نزوریں راجانی گون ءَ لوٹ کنت کہ گوادر ءَ پاکستان ریاست ءِ گنتریں رستری،زوراکیانی بگیری ءَ زوت دگانی سر ءَ در بہ کپ اَنت ، سرجمیں بلوچستان ءَ بند بہ کن اَنت، ھمک جاہ ءَ زھرشانی ءَ بہ نند اَنت ءُ سرجمیں بلوچستان ءَ تھتگ بند ءُ دگ بند ھرتال ءِ جار ءَ جن ایں۔
