گوادر: بلوچ یکجھتی کمیٹیءِ نیمگ ءَ برجاھیں راجی مچی ءَ دوشی تلو ءِ نزیک ءَ پہ بی وائی سی ءِ سروکانی کوش ءِجھد ءَ پاکستانی لشکر ءِ جوڑکرتگیں چیریں ادارھانی دو کارمند مردماں دزگیر کرتگ اَنت۔ چہ دزگیر بوتگیں مردماں یک نائن ایم ایم وتاسے ءُ بازیں تیر دستیگ کنگ بوتگ اَنت۔
شنگ بوتگیں تامربندے ءَ گندگ بیت کہ میاربار وت منگ ءَ اَنت کہ ما را پاکستان ءِ ایم آئی ءَ پہ ڈاکٹر ماہ رنگ ءُ بی وائی سی ءِ آدگہ سروکانی کشگ ءَ دیم داتگ۔
چہ ایم آئی کارمندانی دزگیری ءَ پد پاکستانی لشکر ءَ بی وائی سی ءِ سروک بیھار داتگ اَنت کہ ارشکاراں مئے دست ءَ بہ دے اِت۔
بی وائی سی ءَ زی ھم گوشتگ اَت کہ پاکستانی لشکر ءُ دمگی واکدار بی وائی سی ءِ سروک ڈاکٹر ماہ رنگ ءُ سمی دین ءَ کشگ ءِ بیھار ءَ دیگ ءَ اَنت۔ اے باروا گوادر کمک دمگدار ءِ تواربندے ھم شنگ بوتگ اَت۔
بی وائی سی ءِ زھرشانی ءِ سر ءَ پاکستانی لشکر ءِ ارش ءِ آسر ءَ باز مردم ءِ مرگ ءُ ٹپی بوگ ءِ ھال اِنت۔ پاکستانی لشکر ٹپی بوتگیں مردماں نادراھجاہ ءَ روگ ءَ نہ ھلگ ءَ اِنت۔
