ایمنسٹی انٹر نیشنل ءَ بلوچ راجی مچی ءِ کاروانانی سر ءَ ریاست ءِ نیمگ ءَ زوراکیانی پژدر ءَ بژن درشان کرتگءُ گوشتگ کہ پاکستانی لشکر ءِ نیمگ ءَ زی بلوچ راجی مچی ءِ کاروانانی سر ءَ درکانودی ءُ ناھکیں زور ءِ کارمرز کنگ ءَبژن اِنت۔
ایمنسٹی انٹر نیشنل ءَ گوشتگ کہ پہ اے مردمانی ایمنیں مچی ءَ آجوئی ءِ ھک ءِ تچکی ءَ بگیری اِنت۔
آئی ءَ گوشتگ کہ 27 جولائی ءَ بلوچستان ءِ دمگ مستونگ ءَ دست ءُ کوش ءُ ایمنیں زھرشانی کنوکانی سرءَ ایپ سی ءَ تیرگواری کرتگ ایشی آسر ءَ چاردہ مردم ٹپی بوتگ، چہ آیاں بازءِ جاور ناگیگ اَنت۔
ایمنسٹی انٹر نیشنل ءِ گوشتگ کہ گوادر ءَ سرجم ءَ دامگ بند کنگ بوتگ اَنت ءُ چہ ایشی ءَ تہ ءُ ڈن ءَ ھالانی رسگ ءَ جنجالانی دیمپانی اِنت۔
آئی ءَ گوں پاکستان سرکار ءَ لوٹ کرتگ ءُگوشتگ کہ آ بلوچستان ءَ دامگ ءِ بندی ءَ زوت ھلاس بہ کن اَنت ءُ مردمی ھکانی ڈیھ ءُمیان استمانی کانودانی پارست ءَ وتی زمہ واریاں پیلو بہ کن اَنت دانکہ مردماں ایمنیں زھرشانی ءِ ھک ءَ آسراتی دیگ بہ بیت۔ گوادر ءَ روگ ءُ آھگ ءِ راھانی درسیں اڑاند ھلاس کنگ ءُ مردماں تر ءُ گرد کنگ ءِ آجوئی دیگ بہ بیت۔
