بلوچ راھشون ءُ بلوچ راجی زرمبشت ( بی این ایم ) ءِ پیشیگیں سرکماش ھلیل ءَ وتی شنگ کرتگیں درشانے ءَ گوشتگ کہ بلوچ راج گوادر ءَ ” راجی مچی” بنگپ ءِ سر ءَ یک گْوستانکی مُچی یے ءِ پارست ءَ پاکستانی لشکر ءِدست ءَ ھزارانی کچ ءَ ورنایانی زوریں بیگواھیانی بگیری ءَ توار چست کنگ ءَ اَنت۔ گوادر ءَ اے مزنیں مچی ءَ مردماں پہ توار چست کنگ ءَ کول کرتگ کہ اے ھرچ راج ءِ بنکی مردمی ءُ راجی ھک اِنت۔ بلوچ کھول چہ پاکستان ءَ دگہ ھچ گیشتریں نپ یا نا ھکیں لوٹے کنگ ءَ نہ اَنت بلکیں پہ وتی مردمانی بنکی مردمی ھک ءُ پاکستان ءِ وتی کانود ءُ راھبند ءِ رد ءَ انساپ ءِ لوٹ ءَ کنگ ءَاَنت۔ بلے پاکستانی لشکر ءُ آدگہ لشکری ادارہ اے پہ مچی ءِدارگ ءَ وتی رستری زوراکیاں کارمرز کنگ ءَ اَنت۔
آئی ءَ گوشتگ کہ چہ بلوچستان ءِ جتائیں ھند ءُ دمگاں دیم پہ گوادر ءِ نیمگ ءَ روکیں کاروانانی دارگ ءَ پاکستانی لشکر ءَ زوراکی ءُ جنگی میارباری ءِ گامگیج ءِ زورگ بندات کرتگ۔ پاکستانی لشکر ءَ نہ تیوک ءَ کاروان داشتگ اَنت بلکیں آیانی سر ءَ تچکی ءَ تیرگواری کرتگ۔ ایشی آسر ءَ یک مردمے شھید ءُ باز مردم ٹپی بوتگ۔ اے کارپد نہ تیوک ءَ مردمی ھک بلکیں مردمی شرپ ءُ میان استمانی راھبندانی تچکیں لگتمالی یے۔
ھلیل ءَ گوشتگ کہ من بلوچستان ءَ پاکستان ءِ وتگڑیں واکداراں کڈن کن آں کہ پاکستان گوں ترندی ءَ وتی آسر بیگ ءِ نیمگ ءَ اِنت، بلوچانی گون ءَ راجدروھی ءَ کم چہ کم داں ھدے ءَ بہ دار اَنت، وتی پگار ءَ ھلار بہ کن اِت ءُ پاکستانی لشکر ءَزیارت بہ کن اِت۔ بلے بلوچ ماتانی سریگ ءُ شرپ ءِ گون ءَ لیب کنگ ءَ گوں پنجاپی ءِ میارباری ءَ شریدار مہ بہ اِت۔ چوش مہ بیت کہ اے گرانکدیں سرڈگار شُمئے سڑ اِتگیں مُرتگیں لاش ءَ دو گز زمین مہ دنت، آ روچ پہ پرتو اِبرت ءُ کمشرپی ءِ روچ بیت۔ من وتگڑاں تچکی ءَ گوش آں کہ بلوچ یک راجے ءُ پاکستان یک بے بنیادیں لشکری ریاستے۔ ریاست جوڑ بنت ءُ پرش اَنت،بلے راج چہ چکچینی ءَ ھلاس نہ بنت بلکیں گیش مھکم بنت۔
آئی ءَ گوشتگ کہ پاکستان ءَ زور ءُ رستری ءِ درسیں در کارگپتگ اَنت، اے پہ پاکستان ءَ تچک بوتگ کہ بلوچ یک زندگیں راجے ءُ ھچ راج چہ لشکری زوراکیاں ھلاس نہ بیت۔ چہ اے کاراں بلوچانی دل ءَ ساری ءَ ھستیں کینگ گیش بیت۔ ھمے کینگ پہ پاکستان ءَ تباھی یے بیت۔ نوں بلوچ راج ءَ پہ باسمائیں شور کرتگ ءُ درسیں بھرگ ءُ جنین راجی جھد ءَ یک کچ ءَ شریدار اَنت۔ اے وھد ءَ پہ پاکستان ءَ گھتر ھمیش اِنت کہ وتی زور ءِ کارمرز کنگ ءَ یل بہ دنت چی ءَ کہ بلوچ راج چہ مرگ ءِ ترس ءَ سر گوستگ۔
بلوچ رھشون ءَ گوشتگ کہ پہ بلوچانی زھرشانی ءِ دارگ ءَ زوراکی کنگ ءِ گامگیج پہ بلوچ راج ءِ ھک ءِ زھرشانی ءَ دارگ ءَ یک جھدے بوت کنت۔ بلے بلوچ ءِ جھد برجاہ بیت۔ پاکستان ءِ لشکری کار ءُ چکچینی مئے توان ءَ گیش مھکم کنت۔
