![](https://zrumbesh.com/wp-content/uploads/2024/07/بلوچ-یکجھتی-کمیٹی-1024x576.jpg)
بلوچ یکجھتی کمیٹی ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچ راجی مچی 28 جولائی ءَ یک شمبے ءِ روچ ءَ بیگاہ ءِ سے ءَ پدی زر گوادر ءَ برجم دارگ بیت۔
آئی ءَ گوشتگ :انچوش کہ شما سرپد اِنت ریاست پاکستان پہ بلوچ راجی مچی ءِ بے سوب کنگ ءَ وتی درسیں مڈی ءُ زور ءَ کارمرز کنگ ءَ اِنت، اے ریاستی ترس ءَ تچکی ءَ پدر کنت۔ ایشی ما بلوچ راجی مچی ءِ دیم ءَ ریاست ءِ پروش ءُ بلوچ راجی مچی ءِ سوبمندی سرپد بہ ایں۔
آئی ءَ گوشتگ کہ ما گوں بلوچ راج ءَ لوٹ کن ایں کہ پہ راجی مچی ءِ سوبمند کنگ ءَ ریاست ءِ درسیں زوراکیانی بگیری ءَ گھگیری ءِ وڑ ءُ پیماں کار بگر اِت۔ انچوش کہ ریاست گاڑی واھند، چُل ءُ دکانداران ءَ بیھار دیگ ءَ اِنت، اے پژدر ءَ بلوچ ءِ ھمک مردم وتی گنجاھشت ءِ پارست ءَ گاڑی، راشن ءُ آدگہ ھژدری ساماناں گیش ءَ چہ گیش راجی مچی ءَ سر بہ کنت۔
آئی ءَ گوشتگ کہ چہ ایشی ابید ریاست ءِ زوراکیا ں بلوچ راجی مچی ءِ ارزیشت گیش ودینتگ۔ نوں اے بلوچ یکجھتی کمیٹی ءِ نہ بلکیں تیوگیں بلوچ چاگرد ءِ ھمک بھرگا ں سیادی داروکیں مردم ءِ سرءَ اِنت ءُ بوگ ھم لوٹ ایت۔ اگاں ما مرچی ریاست پاکستان ءِ زوراکیانی دیم ءَ بے توار بہ بہ ایں گڑا ایشی آسرمئے آھوکیں پدریچ ءِ سر ءَ کپ ایت۔ پمیشکا اے وھد ءَ بے توار بوگی نہ اِنت گھگیری کنگی اِنت۔ ھمک بھرگ ءَ ھرپیمں اے گھگیری ءَ وتی کرد پیلو کنگ لوٹ ایت۔ نوں پہ ھمک بلوچ ءَ وتی کرد پیلو کنگ ھژدری اِنت۔
آئی ءَ گڈی ءَ گوشتگ کہ ما 28 جولائی ءَ گوادر ءَ ابید ( دکاندار گوادرءَراجی مچی ءِ بھر زوروکاں سامان ءُ ھژدری چیز بہ دے اَنت) سرجمیں مکران ءَپہ بلوچ راجی مچیءِ شرپ ءَ تھتگ بند ھرتا ل ءِ جار ءَ جن ایں۔ ما سرپد بہ ایں کہ بلوچ راجی مچی بلوچ چکچینی، بلوچ راج ءِ میان ءَ ھم پتی ءِ ودی کنگءُ بلوچ راج ءِ نوکیں جوڑشت ءِ بگیری ءَ یک مھکمیں مردمانی جھدے بندات اِنت۔ اے راجی مچی ءِشرپ ءَ بلوچ راج ءِ درسیں دکاندار، باپاری ءُ باپار پہ رزا ءِ بنیادءَ تھتگ بند ھرھال بہ کن اَنتءُ پہ بلوچ راجی مچی ءُ پدریچ ءِ جھد ءَ وتی کرد ءَ پیلو بہ کن اَنت۔