ڈیرہ گازی ھان ءِ جاہ منند بلوچ نودربر ءُ مردمی ھکانی کارکن سادیہ بلوچ ءَ وتیشنگ کرتگیں تامربندے ءَ گوشتگ کہ من ھما اِنت پہ راجی مچی ءَ بھر زورگ ءَ چہ تونسہ ءَ دیم پہ گوادر ءَ رھادگ بوتگ آں، پنجاپ سرکار، ڈیرہ گازی ھان واکدار ءُ ریاستی ادارہ چار روچ اِنت کہ یکشل ءَ منی گس ءُ کھول ءَ گوں جتائیں وڑ ءُ پیمان ناشرکار گوشگ ءُ ترسینگ ءَ اَنت۔
آئی ءَ گوشتگ کہ منی کھول چہ زوراکیاں دلسیاہ ءُ لاچار بوتگ کہ آیاں وتی گس ھالیگ کرتگ ءُ دگہ گسے ءَ باھوٹ بوتگ اَنت۔
سادیہ ءَ گوشتگ کہ چونیں ھم سیاسی کارے ءَ ھوار بوگ ءُ بلو چستان ءِ سرڈگار ءَ روگ ءَ درکانودی گوشگ بیت؟ چہ سند ءَ زرداری ءُپنجاپ لاھور ءَ نواز شریپ کاینت بلوچستان ءَ نہ تیوک ءَ سیاست ءُ جتائیں مچی کن اَنت بلکیں بلوچستان ءَ سرکاری کن اَنت۔
آئی ءَ گوشتگ کہ من ڈیرہ گازی ھان ءِ واکدار ءُ ریاست ءَ تچکی ءَ گوشگ لوٹ آں کہ من ءَ چونیں ھم پرایمنیں سیاسی کارانی تہ ءَ بھر زورگ ءَکانود ءُ راجمستری ھک ھست۔ اگاں پہ گوادر مچی ءَ بھر زورگ ءِ پژدر ءَ شما درسیں دودمان ءُ راھبند ءَ لگتمال کن اِت ءُ منی گس ءِ زھگ ءُ جنینانی گون ءَ زوراکی کنگ ءُ منی پدکنز کنگ ءَ لاچار کن اِت اے وڑ نہ بیت۔ پمیشکا ما پر ایمن ءُ سیاسی مردم ایں۔
سادیہ ءَ گوشتگ کہ من گوں مردمی ھکانی کارکن ءُ شھزانتیں مردمانی گون ءَ لوٹ کن ایں کہ بلوچ سیاسی باسکے ءِ بگیری ءَ ریاستی زوراکی ءُ ناھکیانی بگیری ءَ توار چست بہ کن اَنت۔
