![](https://zrumbesh.com/wp-content/uploads/2024/07/WhatsApp-Image-2024-07-24-at-06.59.48_ab38b4e7-1024x605.jpg)
شال: بلوچ یکجھتی کمیٹی ءِ سروک ڈاکٹر ماہ رنگ ءَ شال پریس کلب ءَ پریس کانپریس کرتگ ءُ گوشتگ کہ 28 جولائی ءَ گوادر ءَ یک راجی مچی یے برجم دارگ ءِ جار جتگ۔ بلوچ راجی مچی یک پرایمنیں سیاسی کارے اے بلوچ چکچینی، بلوچستان ءِراجی مڈیانی لٹ ءُ پل ءُ بلوچستان ءَ ھر پیمیں مردمی ھکانی بگیری ءَ یکجھتی کمیٹی ءِ زرمبشت ءِ بھرے۔ بلوچ یکجھتی کمیٹی چہ بندات ءَ یک پرایمنیں سیاسی گلے بوتگ، چہ روانک ءَ بگر داں مئے درسیں سیاسی کار پر ایمن ءُ راھبند ءِ پارست ءَ بوتگ اَنت۔ گوستگیں یک ماھے بیت کہ سرجمیں بلوچستان ءَ بلوچ راجی مچی ءِ چنءُ لانچ سکا گوں مھکمی ءَ برجاہ اِنت ءُ اے میان ءَ بلوچ یکجھتی کمیٹیءِ نیمگ ءَ چوشیں کارے نہ بوتگ کہ آ راھبند ءُ کانود ءِ بگیری بہ بیت۔
آئی ءَ گوشتگ کہ گوستگیں یک ھپتگے بیت پہ بلوچ راجی مچی ءِ بے سوب کنگ ءَ بے سوبیں جھد برجاہ اِنت۔ بلوچ راجی مچی ءِ بگیری ءَ بلوچستان ءِ شھر گوادر، ھزدار، پسنی، کلات، تر بت، ھب، شال ءَ ھوار جتائیں شھراں مئے جنین باسک ءُ سروکاں ترسینگ ءُ دزگیر کنگ ءَ اَنت، درزنانی کچ ءَمردم دزگیر بوتگ اَنت۔کراچی ءَ سے باسک لٹ شاپ ءُ بیگواہ کرتگ، چہ ایشی ابیددرزنانی کچ ءَ ایپ آئی آر نبیسگ بوتگ۔
ڈاکٹر ماہ رنگ ءَ گوشتگ کہ اے پنجاپ نہ اِنت اد ءَ زوراکی ءُ چہ لٹ شاپ ءَ مردم ترس آماچ نہ بنت، آ دارگ ھم نہ بنت۔ اے مئے روایت ءَ نیست کہ ما زور ءِ دیم ءَ سرجھل کن ایں ۔ مئے سر برگ بنت بلے جھل نہ بنت۔ اے مئے دودمان اِنت ءُ اے مئے سیاسی ھلیکاری ءِ بھرے۔ نوں اے شمئے سر ءَ اِنت کہ شما وتی اے کارپداں یل کن اِت ءُ زمہ واریں ریاستےءِ منانک ءَ دے اِت یا ھمے وڑ ءَ وتی ناھودگیں رویشتاں برجاہ دار اِت۔
آئی ءَ گوں بلوچاں دلگوش گورکرتگ ءُ گوشتگ کہ ھمے وڑ ءَ شما پہ بلوچ راجی مچی ءَ بلوچ یکجھتی کمیٹی ءَ کمک کنگ ءَ اِت، نوں چہ ایشی ءَ گیش کنگ لوٹ ایت، نوں شمئے سر ءَ زمہ واری گیش بوتگ اَنت۔ ھمے وڑ ءَ گاڑی واھنداں بیھار دیگ ءَ اَنت ما چہ زور ءُ بیھار ءَ ترسوکیں راجے نہ ایں۔ نوں بلوچ ءُ بلوچی ءِ زندگ دارگ ھژدری اِنت۔ نوں پہ بلوچاں وتی دژمن ءِ تونگری ءَ ھاکاں ھوار کنگ ھژدری اِنت۔
ڈاکٹر ماہ رنگ ءَ گوں ریاست ءَ دلگوش گور کرتگ ءُ گوشتگ کہ بلوچ راجی مچی ھر پیم ءَ گوادر ءَ بیت۔ پہ ایشی تو زور کارمرز بہ کن ئے بلے راجی مچی الم بیت۔ اگاں تو اے وڑ ءَ زور کارمرز کنگ برجاہ داشت گڑا ما سرجمیں بلوچستان ءَ شھدگاں بے آسریں وھدے ءَ بند کن ایں۔ ما سرکاری کارگسانی دیم ءَ گوں مردمانی زور ءَ نندانک ءَ نند ایں۔ اگاں ریاست گوں پر ایمنی ءَ بلوچ راجی مچی ءَ برجم دارگ ءَ کل ایت گڑا ما بلوچ یکجھتی کمیٹی ایشی زمہ واری ءَ زورایت ھچی تاوان نہ بیت۔ سکا گوں راھبند ءَ دیوان ءَ برجم دار ایں۔ بلے اگاں بلوچ راجی مچی ءِ دیم ءَ اڑاند ودی کنگ ءِ جھد ءُ روز کارمرز کرت ءُ مردمانی چیڑینگ ءِ جھد کرتگ اے وڑا ما مردماں ھچ وڑ ءَ داشت نہ کن ایں ءُ درسیں زمہ واری ریاست ءِ سر ءَ بنت۔