![](https://zrumbesh.com/wp-content/uploads/2024/07/C981252D-2739-49DB-9AC3-4C501F31645F-1068x712-1-1024x598.jpeg)
ھاران: بلوچ یکجھتی کمیٹی ءِ نیمگ ءَ پہ گوادر ءَ بیست ءُ ھشت جولائی ءَ بلوچ راجی مچی ءَ چنءُ لانچ برجاہ اِنت۔ زی بلوچ یکجھتی کمیٹی ءِ نیمگ ءَ نواب اکبر اسٹیڈیم ءَ دیوانے برجم دارگ بوتگ۔ جنین ءُ زھگاں ھوار مردماں بازیں کچے ءَ بھر زرتگ۔
دیوان ءَ بلوچ یکجھتی کمیٹی ءِ سروک ڈاکٹر سبیہ ءَ تران کرتگ ءُ گوشتگ کہ ما پہ پجار ءِ نام ءَ جنگ بوگ ءَ ایں، بلوچ چکچینی جتائیں پیماں برجاہ اِنت۔دو سد سال ساری ءِ بلوچ ءُ مرچیگیں بلوچ ءَ پرک اِنت۔ دوسد سال پیش بلوچ ءِ وتی نزام بوتگ۔ مرچی بلوچ نمازی، زکری ءُ جتائیں ٹکانی تہ ءَ بھر ءُ بانگ اِنت۔
آئی ءَ گوشتگ کہ بالاچ ءَ کشتگ ءُ بی ایل اے ءِ نام داتگ، بلے آئی کھول ءَ لاش زرتگ ءُ دگ ءِ سر ءَ نشتگ اَنت ءُ زھرشانی اِش کرتگ۔ آ اے گپ ءَ سرپد بوتگ اَنت کہ بالاچ پد ءَ زندگ نہ بیت۔ بلے آیاں پمیشکا زھرشانی کرتگ کہ دگہ یک بالاچے ءِ گون ءَ ھمے وڑ مہ بیت۔
ڈاکٹر سبیہ ءَ گوشتگ کہ یک نودربرے پہ وتی ھکاں توار چست کنت پہ آئی آوار جنگ ءَ دہ دہ گاڑی کیت۔ بلے نشہ بھا کنوک مئے پدریچ ءَ تباہ کنگ ءَ اَنت بلے آیانی باروا کس سرپد نہ اِنت۔ پمیشکا مئے ءُ شمئے یکجاھی ءُ مھکمیں جھد مئے مردماں پھریز ات کنت۔
آئی ءَ گوشتگ کہ بلوچ یکجھتی کمیٹی ءِ کاروان مرچی سرجمیں بلوچ راج ءِ یک زمہ واریں گلے ءُ وتی راجی زمہ واریاں شریں وڑے ءَ سرپد بیت ءُ پیلو کنت۔ من گوں مردماں ھمے لوٹ ءَ کن آں کہ اگاں بلوچ راج پھریزگی اِنت ءُ جھان ءَ مھکمیں راجے ءِ منانک دیگی اِنت گڑا 28 جولائی ءِ روچ ءَ یکجاہ بہ بہ اِنت۔ مردم ھر پیمیں کمک کنگ ءَ وتی راجی زمہ واریاں پیلو بہ کن اَنت۔